КъЧР-ни Сайлау комиссиясында кърал дараджада бардырылгъан «Софиум» олимпиаданы джергили этапында хорлагъанлагъа саугъала берилгендиле.

Алайды да, 2025-чи – 2026-чы джылны биринчи чагъында хорлагъанланы Къарачай-Черкесияны Сайлау комиссиясыны председатели Абазалыланы Лариса дипломла бла саугъалагъанды.
Ол, сохталаны бу ишге толу берилиб, иги джетишимлеге ие болгъанларын да чертгенди. Биринчи сайлау чакъгъа КъЧР-ни 10-чу – 11-чи классларыны сохталарындан 43 адам къошулгъанды – 23 онбиринчи, 20 да онунчу класслада окъугъанла болгъандыла.
Мероприятие очно халда Шимал Кавказ кърал академияны тамалында бардырылгъанды. Анга къошулгъанла эссе эмда сынау иш джазгъандыла. КъЧР-ни Сайлау комиссиясыны келечилери тёртеуленни ишлерин эм игиге санагъандыла: Борлакъланы Лейланы, Лейла Туаршеваны, Алина Мешезованы эмда Глеб Дайдименкону.
Ала регионал этапны экинчи чагъына къошуллукъдула. Ол электрон халда эндреуюк (декабрь) айда Эресейни Ара Сайлау комиссиясыны сайтында ётерикди. Аны бла бирге анга озгъан чакъда биринчи орунну алгъан Родион Колесников да къатышыргъа эркинди.
«Софиум» сайлаула бла байламлы Эресей дараджада бардырылгъан, сохталагъа джораланнган олимпиадады. Аны Эресейни Ара Сайлау комиссиясы къурагъанды.