2025-чи джылны он айыны ичинде Эресейни бютеу регионларыны араларында эм кёб турист Къарачай-Черкесиягъа келгенди. Туристлени саны, озгъан джылны бу кёзюую бла тенглешдирсенг, 2,3 кереге ёсгенди.

Аны алайлыгъын Эресей Федерацияны Правительствосуну Председателини орунбасары Дмитрий Чернышенко чертгенди.
Ол билдиргеннге кёре, башил – аууз-герги (январь – октябрь) айлада къралда туристлени саны 4,8 процентге ёсгенди.
– Ич туризм иги джюрюш алгъанды. Эм игиси уа, къыш, джай деб къарамай, джылны къайсы чагъында да туристле джолгъа чыкъгъанлай турадыла, – деб къошханды Вице-премьер.
Къарачай-Черкесиядан сора алчы регионланы къурамына талай субъект киргенди: Адыгей Республика, Тверь область, Къалмукъ Республика, Чукот автоном область.
Эресей Федерацияны экономика ёсюмюню министри Максим Решетников айтхандан, къралны адамларына солур эмда кёз ачар джерле кёбден кёб бола барадыла.
– Уллу курортла, туристлени кеслерине илешдирир ючюн, тюрлю-тюрлю байрамла, мероприятиеле бардырадыла. Ол затла джылны къайсы бир чагъында да курортланы адамсыз къоймайдыла. Эресейге тыш къралладан келген туристлени саны да ёсюб барады, – дегенди Максим Решетников.
Айтылгъан кёзюуню ичинде туристлени эм кёбюсю Москвагъа, Краснодар крайгъа, Санкт-Петербургга, Татарстаннга, Кърымгъа, Свердлов областха, Ставрополь крайгъа, Тюмень эмда Ростов областлагъа джол тутхандыла.