Эндреуюк (декабрь) айны 8-де Къарачай-Черкесияны Башчысы Темрезланы Рашид регионда къаты багушну къурутууну хакъындан кенгеш бардыргъанды.

Башчы бла ачыкъ эфирде бу темагъа соруула берилгенлери да, башха билдириуле да ол джумушха джамагъат бек къайгъыргъанын кёргюзедиле.
Кенгешге къошулгъанла, аны эсге ала, бюгюнлюкде къаты багушну къурутхан система къалай ишлегенин, ол джаны бла къаллай джарсыула болгъанларын эмда кемликлени тюзете, ишни табыракъ къураргъа джарарыкъ мадарланы сюзгендиле.
Ала инфраструктураны джангыртыугъа, эркинликсиз къуралгъан багушланы къурутуугъа, къаты багушну къоратхан операторланы ишлерин къолгъа алыб, джамагъатны ол джумушун тыйыншлысыча баджарыугъа айырыб эс бёлгендиле.
КъЧР-ни табигъат байлыкълары бла экологиясыны министри Къочхарланы Диана республиканы Башчысына, багушха чыгъарылгъан затланы джараулусун джангыдан джарашдырыугъа, джараусузун къурутуугъа аталгъан джангы къуралгъан проектни юсюнден толу хапар айтханды.
Министр айтхандан, ол ишге джууаблы федерал, регионал къуллукъчула да, «Российский экологический оператор» ППК да ол проектни келишиулюге санагъандыла.
Аны баш мураты, регионал операторланы тири ишлетиб, «Экологическое благополучие» деген миллет проектге кёре къуралгъан «Экономика замкнутого цикла» деген федерал проектни нюзюрюне джетиудю.
Темрезланы Рашид, министрни докладына тынгылаб, бу ишни баджаргъан заманда джорукъну къаты сакъларгъа, салыннган борчланы тамамлы толтурургъа кереклисин чертгенди.
«Джердешлерибизни джашаулары кирсиз да, таб да болууу ТКО-ну къурутууну системасы къалай ишлегенине кёре боллукъду», – дегенди республиканы Башчысы.