Мындан алда Москвада КъЧР-ни Башчысы Темрезланы Рашид Эресей Федерацияны билим бериуню хакъындан министри Сергей Кравцов бла тюбешгенди.
Тюбешиуде ала бизни регионда билим бериуню дараджасын ёсдюрюуге аталыб, быйыл баджарылгъан ишлени ал эсеблерин сюзгендиле.
Башчы бла федерал министр мындан ары «Молодёжь и дети» эмда «Семья» деген миллет проектлени тамалларында бизни республикада школланы, сабий садланы джангыртыуну, джангы билим бериу учреждениеле ишлетиуню аны кибик башха ишлени юслеринден да оноулашхандыла.
Темрезланы Рашид, Эресейни Президенти Владимир Путинни кёлтюргючлюгю эмда Сергей Кравцовну башчылыгъы бла Билим бериуню хакъындан федерал министерствону бютеу къуллукъчулары болушханлары Къарачай-Черкесияда билим бериуню джангыртыугъа аталгъан кърал программаланы джетишимли толтурургъа себеб болуб тургъанларын чертгенди.
Ол айтхандан, бу джылны ахырына бизни регионда инфраструктуралары заманны излемине кёре джарашхан школланы саны 63-ге джетгенди, 2 сабий сад да джангыртылгъанды.
Дагъыда Дружбада, Архызда, Адыге-Хабль бла Хабезде джангы школла ишлене турадыла. Аны кибик Черкесск шахарны 6-чы номерли школуна 400 сабийге джораланнган къошакъ мекям ишлене турады, аны къурулушу тири бардырылады, Архыз посёлокда сабий садха да аллай къошакъ мекям ишлениб башланнганды.
КъЧР-ни Башчысы федерал министрге бизни регионда сабийлеге, джаш адамлагъа окъуу-билим алыргъа джангы таблыкъла къуралгъандан сора да, аланы ариу халиге юретиуге, патриот ангыларын бегитиуге аталыб, кёб иш этилгенин айтханды, бютюн да бек быйыл, Уллу Хорламны 80-джыллыгъы белгиленнген джыл.
Темрезланы Рашид бла Сергей Кравцов керекли усталаны хазырлауну юсюнден да сёлешгендиле. Ала джаш адамлагъа орта усталыкъла алдырыр, къошакъ билим берир, фахмулу сабийлеге кёлтюргючлюк этер мадарланы да сюзгендиле.
Тюбешиуню ахырында Сергей Кравцов: «Арт джыллада Къарачай-Черкесия белгиленнген ишлени баджарыуда тирилик танытханын кёребиз. Джангыртылгъан школланы саны, джангы билим бериу учреждениелени къурулушлары тамамлы бардырылгъаны къууандырады. Инфраструктурадан башлаб, сабийлени патриот сезимлерин ёсдюрюуге дери, хар ишге да тыйыншлы эс бёлюннгени бек игиди. Элчи, шахарчы болсун, хар сабий да иги билим алырча, фахмусун толу хайырландырырча болум къурау бизни баш борчубузду. Бу ишлени юслеринде регионлагъа болушлукъ этгенлей турлукъбуз», – дегенди.
Темрез улу да федерал министрге, бизни регионнга иги эс бёлгени, билим бериу санагъатыбызны айнытыргъа болушлукъ этгени ючюн, разылыгъын билдиргенди.
