Ата джуртну джигитлерини кюнюнде КъЧР-ни Башчысы Темрезланы Рашид аскер къаугъаны ветеранлары бла тюбешгенди. Аланы арасында «Герои Карачаево-Черкесии» деген кадр программагъа къошулгъанла да болгъандыла.

Тюбешиу ачыкъ эмда джылы халда ётгенди. Аскерчиле бюгюнлюкде алагъа магъанасы болгъан затланы – социал болушлукъну, аскерден башларына бош болгъандан сора не бла кюреширге мурат этгенлерини – юсюнден сёлешгендиле. Республиканы Башчысы джигитлени хар бирине разылыгъын билдиргенди.
«Аскерчилени кереклилерине, джарсыуларына тюрлю-тюрлю ведомствола бла бирге эс бёлюб къарайбыз. Бюгюнлюкде республикада СВО-гъа къошулгъанла бла аланы юйдегилерине джораланнган болушлукъ мадарла бардыла. Алай болса да, ол джаны бла ишни тохтаусуз бардырлыкъбыз. Къарачай-Черкесия джигит аскерчилерибиз бла ёхтемленеди. Сиз юйдегилени, сабийлени, туугъан джуртубузну, къралыбызны къоркъуусузлугъун бегитесиз.
Аскерчилени юйдегилерине да уллу бюсюреу этерге излейме. Сизни керти дагъанлыкъ этгенигиз бла джашларыбыз салыннган борчланы айыбсыз толтурадыла. Мындан ары да республика сизге болушханлай, джарсыуларыгъызгъа къарагъанлай турлукъду», – дегенди КъЧР-ни Башчысы Темрезланы Рашид.