Бу кюнледе Москвада Къарачай-Черкесияны Башчысы Темрезланы Рашид РФ-ны илму бла баш билим бериуюню хакъындан министри Валерий Фальков бла тюбешгенди.
Тюбешиуде билим бериу санагъатны айнытыугъа аталгъан миллет проектлени толтурууну, КъЧР-ни ВУЗ-ларыны материал-техника базаларын байындырыуну, республикабызны экономикасына ёсюм алдырырча иги устала хазырлауну юсюнден сёлешиннгенди.
Ол тюбешиуню юсюнден Къарачай-Черкесияны Башчысы Темрезланы Рашид MAX мессенджерде кесини аккаунтунда: «Бюгюнлюкде бизни республикада баш билим берген 7 ВУЗ барды. Аладан 2-си – Шимал Кавказ кърал академия бла Алийланы Умар атлы Къарачай-Черкес кърал университет – федерал кърал ВУЗ-ла.
Республиканы бютеу ВУЗ-лары да, урунууну рыногундан хапарлы болуб, Къарачай-Черкесиягъа керекли усталаны хазырлайдыла. Ала быйыл 959 устаны чыгъаргъандыла. «Работа в России» деген платформада джыйылгъан информациягъа кёре, выпускниклени 66 проценти иш орунлу болгъанды», – деб джазгъанды.
Башчы билдиргенден, тюбешиуде джангы башланныкъ окъуу джылгъа хазырланыуну ал эсеблерин сюзгендиле, сохталаны усталыкъ сайларгъа юретиуге аталгъан ишлени тири бардырыргъа кереклисини юсюнден сёлешгендиле. Алай этилсе, джаш адамла болумлары, фахмулары, джюрек излемлери къайсы усталыкъгъа келишириклерин толу ангыларыкъдыла.
Темрезланы Рашид бла Валерий Фальков фахмулу студентле бла джаш алимлени илму программалагъа къошулургъа кёллендирир, алагъа кёлтюргючлюк этер мадарланы да сюзгендиле.
Башчы бюгюнлюкде бизни республикада 52 студент Къарачай-Черкесияны Башчысы бла Правительствосундан энчи стипендия алгъанын, дагъыда 6 фахмулу джаш алимге да джыл сайын регионал грантла берилгенлерин чертгенди.
«Республиканы ВУЗ-ларына ёсюм алдырыуну юсюнден сёлешдик. Тюбешиуде этилген оноугъа кёре, «Молодежь и дети» деген миллет проектни тамалында къуралгъан «Создание сети современных кампусов» деген федерал конкурсха къошуллукъбуз. Аны ШККъА-ны тамалында толтурлукъбуз. Валерий Николаевич бла билим бериу санагъатха ёсюм алдырыргъа джарарыкъ башха ишлени юслеринде да къысха байламлылыкъ джюрютюрге келишгенбиз», – дегенди Темрезланы Рашид.
