Эресей дараджада «Тёппеси» («Вершина») деген 3-чю инвестицион ёчге къошулургъа излегенле къагъытларын берирге боллукъларыны юсюнден Кавказ инвестицион форум билдиргенди. Къагъытланы 2026-чы джыл алтотур (март) айны 1-не дери аллыкъдыла.

Лауреатланы къууанч халда 2026-чы джыл хычаман (май) айны 17-ден – 19-на дери Минеральные Воды шахарны «Минводы экспо» МВЦ-да алгъышларыкъдыла.

Форумну Росконгресс фонд къурагъанды, Эресей Федерацияны Правительствосу, РФ-ны Экономика ёсюмюню министерствосу, Ставрополь крайны Правительствосу болушлукъ этгендиле.
«Тёппеси» инвестицион ёчню баш мураты регионланы эмда миллет экономиканы ёсюмлерине джол берлик онглу проектлени сюзюудю, алагъа тыйыншлы эс бёлюудю.

Онбир номинация боллукъду. Хар ким, кесини болуму, фахмусу джетгенине кёре, алагъа къошулургъа эркинди. Кимден да изленнген зат: алчы технологияланы тамалында социал-экономика болумну айнытырыкъ проектле болсунла.

Эресейде джашагъан адамла эмда организацияла джангы, файдалы проектлерин таукел теджерге боллукъдула.
Эресейни регионларын ёсюмню джолуна чыгъарыргъа боллукъ проектлени бири да сансыз къаллыкъ тюлдю.

Номинацияланы эмда сайлау иш къалай барлыгъыны хакъындан хапар билирге излегенле Кавказ инвестицион форумну сайтыны «Ёч» бёлюмюне кёз джетдирирге боллукъдула.