Мындан алда Байчораланы Мариямны атын джюрютген Къарачай-Черкес тарих-маданият музейни-заповедникни сурат галереясында «Художественные образы легендарных личностей» аты бла КъЧР-ни халкъ суратчысы, скульптор Хабичланы Исмаилны джашы Магометни къол ишлерини кёрмючю ачылгъанды.
Кёрмючге КъЧР-ни Правительствосуну эмда джамагъат бирлешликлени, республиканы муниципал районларыны келечилери, джазыучула, поэтле, маданият бла эмда санат бла кюрешген устала, авторну чыгъармаларына айырыб эс бёлгенле, суратларын сюйген адамла, журналистле келген эдиле. Анда авторну 50-ден аслам ишин кёргюзгендиле.
Музейни директору Хасанланы Ханафий, кёрмючню ачыб, Хабич улуну джашауундан, чыгъарамачылыкъ джолундан къысха доклад этгенден сора, башхалагъа да сёз берди.
Гитче Къарачай районну администрациясыны башчысыны биринчи орунбасары Гыналаны Асият, Хабич улуну маданиятха салгъан къыйынына сый бериб, районну администрациясыны башчысыны атындан алгъышлаб, мындан ары да джангы ишлери бла кёб джылланы миллетин къууандырырча кюч-къарыу, эсенлик теджеди.
Къарачай-Черкесияны халкъ поэти Байрамукъланы Фатима да, Хабич улуну эртделеден таныгъанын черте, авторну фахмусуна сый бериб, джангы къурагъан чыгъармалары бла алгъышлаб, авторгъа саулукъ, узакъ ёмюр, джетишимле теджеди.
Джыйылыуда Хабич улуну хунерлигине махтау сёзле айтыргъа, разылыкъларын билдирирге излегенле кёб эдиле. Кертиси да, республикабызда белгили адамланы ёмюрлюкге салыннган эсгертмелеринде Магометни къол ызы дженгил танылады. Сёз ючюн, Акъ юйню тийресинде салыннган эсгертмеле – республиканы биринчи Башчысы Хубийланы Владимирни, республикабызда белгили джамагъат къуллукъчу, юрист илмуланы доктору Калмыков Юрийни, Ата джуртха къуллукъ этиуню юлгюсю, аскер эмда урунуу орденлени иеси Лыжин Николайны, Черкесск шахарны сыйлы адамы Хапсироков Назирни, Къарачайны онглу уланларыны бири Боташланы Магометни, «Джашил айрымканны» Аскер махтауну аллеясында авиацияны генерал-майору, Эресей Федерацияны Джигити Боташланы Къанаматны бюстлери – Хабичланы Магометни уста къоллары бла этилгендиле.
Андан сора да, Ючкекенде Джигитлени аллеясында Эресейни Джигитлери Голаланы Джанибекни, Чочуланы Харунну, Ижаланы Абдулланы бюстлерине, Къарачай халкъны сюргюн болгъанына эмда туугъан Джуртларына къайтханына аталыб, «Эркинликсиз эркинлик» деген аты бла эсгертмеге да Хабич улуну кёб джылланы кюрешген къыйыны салыннганды. Къарачай шахарда Совет Союзну Джигити Къасайланы Османнга сослан ташдан эсгертмени да Магомет этгенди. Хабич улуну хунерлик ишлери къуру была бла тохтаб къалмайды. Ол, чемерликни талай тюрлю джаны бла кёргюзюрге кюреше, кесине да джангы затла къурагъанлай турады.
Магометни миллетини белгили адамларындан сора да, тарихни, космосну, нарт эпосну темаларына аталгъан терен магъаналы суратлары бла скульптуралары кёбдю. Сёз ючюн, авторну «Джулдузланы туугъанлары» («Рождение планет»), «Къарча», «Алан Башчы», «Апсатыны къызы – Фатима», «Гошаях бийче», «Таулула» атлары бла джезден, ташдан, пластикден дагъыда башха затладан этилген талай хунерлик иши барды. Айтыргъа, къуру сагъышларындан сора да, ич дуниясы, тин байлыгъы да суратлада ачыкъ кёргюзюледи, авторну джюрегинде сезимледен къуралгъан суратладыла барысы да. Алайды да, Хабич улу Магометге ташлагъа джан салгъан устады десек да, джангылмазбыз.
Чертерге тыйыншлыды, Магометни талай хунерлик иши Францияда, Европаны бирси къралларында да кёрмючлеге салыныб кёргюзюлгенлей турадыла. Мындан алда да аллай кёрмючлени биринде аны «Къарча» деген ишине уллу багъа берилиб – мийик саугъала бла саугъаланнганды. Кеси да, 25 суратны бири болуб, Грецияда къралла арасында джюрюрюк орузлама китабха тюшгенди.
Сурат салыуну бу тукъум мийик дараджагъа чыгъаргъан адамгъа тыйыншлы сый берилмегенин да чертдиле джыйылыуда – «Эресей Федерацияны махтаулу суратчысы» деген атха тыйыншлы болгъанын бир аууздан билдирдиле барысы да. Джыйылыуну тамамлай, алайгъа келген адамланы залгъа чакъырыб, авторну хунерлик ишлерине къараргъа теджедиле.
Эсигизге салыргъа излейбиз, кёрмюч эндреуюк (декабрь) айны 22-не дери барлыкъды, фахмулу суратчыны ишлерине ким да къараргъа боллукъду.
БАТЧАЛАНЫ Фатима.
