Къарачай-Черкесия, 2024-чю джылны эсеблерине кёре, туризмни айнытыуда Шимал Кавказ федерал округда биринчи оруннга, Эресей Федерацияда да онючюнчю оруннга ие болгъанды. Аны юсюнден Къарачай-Черкес Республиканы Башчысы Темрезланы Рашид МАХ-да кесини каналында джазгъанды.

Эсеблени Эресей Федерацияны туризм бла байламлы Кърал советини комиссиясы чыгъаргъанды.
Туризмни ёсюмюне багъа берген заманда кёб тюрлю затха эс бёлюннгенди: улоугъа, инфраструктурагъа, ишлеген адамлагъа, къоркъуусузлукъгъа, туристлени эркинликлери къалай сакъланнганына, социал туризмге, джумуш баджарыугъа, технологиялагъа, инвестициялагъа.
– Сёзсюз да, Къарачай-Черкесияны социал-экономика политикасында туризмни аякъ юсюне салыугъа уллу эс бёлюнеди. Ол себебден, бизге солургъа келген къонакълагъа не къадар таб болурча этерге да кюрешебиз. Айхай да, юйдегилери бла келгенлеге иги болумла къурауну, аланы излемлерин толтурууну баш джумушланы бирине санайбыз. Бизде туризмни айный баргъанын бегитген затла аз тюлдюле. Къонакъланы саны кёбден кёб бола баргъаны да аланы бириди. Сёз ючюн, былтырдан быйыл бизни курортларыбызгъа джол салгъанла 10 процентге аслам болгъандыла. Аллай джетишимге Эресей Федерацияны Президентини, РФ-ны Правительствосуну болушлукълары бла джетгенбиз. Аны кибик, республиканы власть органлары бир джумдурукъ болуб ишлегендиле, инвесторла, табышлылыкъ иш бла кюрешгенле да тыйыншлы юлюш къошхандыла. Бир-бирибизни ангылаб ишлегенибиз Къарачай-Черкесияны Шимал Кавказны эм онглу турист аралыкъларыны бири болургъа себеблик этеригине бир тукъум ишегим джокъду, – деб джазгъанды КъЧР-ни Башчысы Темрезланы Рашид МАХ-да кесини каналында

Маралланы Ина.