Къарачай-Черкес Республикада 2022-чи джылгъа дери 1000 арбаз бла  адамла джюрюген, джыйылгъан, кёб болгъан 150 джер джарашдырылыб, айбат тюрсюн аллыкъды.
 Ол иш «Шахар таблыкъла къурау» деген проектни джашаугъа кийире, Къарачай-Черкес Республиканы Башчысы Темрезланы Рашид быйылны Шахарла бла эллени джарашдырыуну джылы этиб баямлагъаны бла байламлы, этилликди. Анга кёре, бюгюнлюкде республикада 72 муниципал программа къуралгъанды.
Шахарланы, эллени джарашдырыуну ишлерине къарагъан ведомствола арасы комиссияны кенгеши болгъанды. Аны Къарачай-Черкесияны Правительствосуну Председателини орунбасары Сергей Смородин бардыргъанды. Комиссияны кенгешине къошулгъанланы арасында Россияны Президентини Шимал Кавказ федерал округда Толу эркинликли келечисини аппаратыны федерал инспектору Юрий Ясько, Къарачай-Черкес Республиканы Джамагъат палатасыны председатели Вера Молдованова, КъЧР-ни къурулушуну эмда фатар-коммунал мюлклерини министри Евгений Гордиенко, профилли министерствола бла ведомстволаны келечилери бар эдиле.
Эсигизге салайыкъ: Къарачай-Черкесияны Башчысы Темрезланы Рашид, быйылны Шахарланы, эллени джарашдырыуну джылы этиб баямлай, Правительствону членлерине шахарланы, эллени джарашдырыуну планларын терк хазырларгъа борч салгъанды. Джарашдырыу ишлеге къошулуб, аланы иги джанына тюрлендириуде энчи юлюшлери болсала, адамланы кёллери кёлтюрюллюклери да айтылгъанды. Халкъ бла биригиб, бирге ишлеу, Джарашдырыуну джылыны баш ишлерини бири болгъанын да чертгенди Башчы.
«Шахар таблыкъла къурау» деген проектге кёре регионну джеринде аны бла байламлы этиллик ишле 2022-чи джылгъа дери барлыкъдыла. Ол заманны ичинде юйлени  арбазлары, джамагъат аслам джыйылгъан джерле бары да ариу джарашдырыллыкъдыла.
Кенгешде белгиленнгенден, муниципал къуралышла адамланы айтханларына, этген оюмларына кёре, айбатлы этерге керек болуб тургъан джамагъат джерлени эсебге алыб, анга кёре  планларын терк салыргъа керекдиле. Ол ишни юсюнде ашыгъыргъа тыйыншлыды.
Алай бла быйыл февралны 16-на дери джарашдырыллыкъ джамагъат джерлени рейтинг чёб атаргъа къалайлары тыйыншлы болгъанлары баямланныкъдыла. Андан сора аланы 2022-чи джылгъа дери къайсылары ариу тюрсюн аллыкълары белгиленникдиле. Быйыл а, адамла къайсыларына кёб чёб атсала, ала этилликдиле.
 
ЛЕПШОКЪЛАНЫ Хусеин.
 
 
{jcomments}