Зеленчук стансени 3-чю орта школуну 11-чи классыны сохтасы Магомед Фаллахи Россия Федерацияны Президентин сайлаугъа аталгъан интернет-олимпиадада ючюнчю орунну алгъанды.
Бу олимпиаданы РФ-ны Ара сайлау комиссиясы къурагъанды.
КъЧР-ни Башчысыны эмда Правительствосуну Администрациясыны тамадасы Салпагъарланы Эльдар бла Россияны Ара сайлау комиссиясыны члени Сиябшах Шапиев Магомедни алгъышлагъандыла, КъЧР-ни Башчысыны Бюсюреу къагъытын бериб, окъууда мындан ары да джетишимле теджегендиле.
Сайлаула тыйыншлы дараджада ётер, джаш адамланы аланы джорукълары бла шагъырей этер ючюн, РФ-ны АСК-сы (ЦИК) 2017-чи джыл ноябрны 1-ден декабрны 25-не дери сохталаны арасында интернет-олимпиада бардыргъанды.
Ол эки къауумгъа юлешиниб ётгенди: регионал эмда федерал Федерал дараджада. Федерал дараджада бардырылгъан олимпиада официал сайтны сервислерини юсю бла ётгенди. Анга къошулгъанланы тестге, болумгъа берген джууабларына эмда творчество ишлерине къаралгъанды.
Интернет-олимпиаданы эсеблерин ишден терен хапарлы адамладан къуралгъан жюри чыгъаргъанды.