Мындан алда Россиячы миллет гвардияны аскерлерини федерал къуллугъуну директоруну 1-чи заместители, генерал-полковник Меликов Сергей КъЧР-ни Башчысы Темрезланы Рашидни Россиячы миллет гвардияны Шимал Кавказ округда аскерлерини башчысыны борчларын толтуруб башлагъан генерал-лейтенант Конюшкин бла танышдыргъанды.
Талай кюнню алгъа Россиячы миллет гвардияны аскерлерини федерал къуллугъуну директоруну биринчи орунбасары, генерал-полковник Меликов Сергей Къарачай-Черкес Республиканы Башчысы Темрезланы Рашидни аны бла танышдыргъанды.
Ол тюбешиуню кёзюуюнде Темрезланы Рашид бла Меликов Сергей республиканы властлары бла Россиячы гвардияны, аны кибик Россия Федерацияны бирси джорукъ сакълаучу органларыны араларында иш джюрютюуню юсюнден сёлешгендиле. Ала неден да алгъа Россия Федерацияда барлыкъ президент сайлауланы кёзюулеринде да, андан ары заманда да Къарачай-Черкесияда джамагъат мизам къаты сакъланырча этерге кереклисин чертгендиле. «Биз, - дегенди Меликов Сергей, тюбешиуде сёлеше, - Къарачай-Черкесияда джашагъанланы джамагъат къоркъуусузлукъларын сакълауну, аланы конституцион эркинликлерин къоруулауну баджарыуну уллу магъанасы болгъанын бек ариу билебиз. Ол борчланы биригиб толтурургъа да кюреширикбиз».
Россиячы миллет гвардияны аскерлерини федерал къуллугъуну директоруну биринчи орунбасары, генерал-полковник Меликов Сергей айтхандан, генерал-лейтенант Корнюшкин Сергейни аскерлеге башчылыкъ этиуде уллу сынамы барды, ол Шимал Кавказ федерал округга кирген субъектледе болумну иги биледи. Ол мында джамагъат къоркъуусузлукъну сакълау бла тынчлыкъны бегитиуню борчларын толтурур хыйсаблыды.
«Белгилисича, Къарачай-Черкесияда джамагъат мизамны сакълаучу ведомствола бир-бирлери бла байламлылыкъда ишлейдиле. Аланы алай биригиб ишлеулери уа республиканы Башчысы Темрезланы Рашидни Джамагъат джорукъну сакълау бла терроризмге къаршчы кюрешген координацион комиссияны къуллугъун таб къурагъаны эмда аны этимли бардыргъаны бла къысха байламлыдыла», - дегенди Меликов Сергей.
Къарачай-Черкесияны Башчысы Темрезланы Рашид да, тюбешиуде сёлеше, Россиячы миллет гвардияны аскерлерини Шимал Кавказ федерал округда тамадасын быллай дараджада кёргюзгени ючюн Меликов Сергейге джюрек разылыгъын билдиргенди.
«Россия Федерацияны Президентини Россиячы гвардияны Шимал Кавказ федерал округда аскерлерин къурауну юсюнден бегим этгени Россия Федерацияны башчылыгъыны Шимал Кавказгъа уллу эс бёлгенин кёргюзеди. Алай бла ол округну субъектлериндеча, Къарачай-Черкесияда да рахатлыкъ бла келишмеклик орналыб турлукъларын излейди. Бизни республика Россия Федерацияда эм къоркъуусуз субъектлени бири болгъанлай къалады. Аны себебли джамагъат джорукъну бегитиуде ведомствола арасы байламлылыкъны сакълагъан кюч органлагъа, властны органлары бла кеси оноуларын кеслери этген джергили органлагъа джюрек разылыгъымы билдиреме. Республикада джамагъат къоркъуусузлукъ аланы этимли ишлей билгенлери бла сакъланады. Аны кибик Россиячы миллет гвардияны Къарачай-Черкесияда бёлегини ишине да уллу багъа береме. Бюгюн бизни барыбызны да баш борчубуз Россия Федерацияда президент сайлаула баргъан заманда, андан ары кёзюуде адамланы конституцион эркинликлерин сакълауну баджарыуду», - дегенди Къарачай-Черкесияны Башчысы Темрезланы Рашид, тюбешиуде сёлеше.
Тюбешиуню ахырында Меликов Сергей Россиячы гвардияны Къарачай-Черкесияда бёлюмюню алчы къуллукъчуларына РФ-ны Президентини указына кёре кърал саугъала бергенди. Аланы ичинде Росгвардияны КъЧР-де бёлюмюню тамадасы, полицияны полковниги Салпагъарланы Рашид Ётгюрлюкню ордени бла, 4 къуллукъчусу да медалла бла саугъаланнгандыла.
