Къарачай-Черкесиядан «Хранители Кубани: сказание о великой битве. Мультфильм для детей о дружбе народов Карачаево-Черкесии» деген проект Маданият башламчылыкъланы президент фондуну грант конкурсунда хорлагъанланы тизимине киргенди. Бютеулей да конкурсну тамалында къралыбызны 86 регионундан 810 командагъа болушлукъ этилликди.

Бизни республикадан теджелген проектни авторлары Мурат Хутов бла Байрамукъланы Ася айтханнга кёре, Къарачай-Черкесияда джыллары 7-ден 12-ге дери болгъан сохталаны граждан джууаблылыкъларын, миллет эмда патриот сезимлерин ёсдюрюу, бирикмекликни магъанасын ангылатыу аланы баш муратларыдыла.
Сюжетге кёре, мультфильмни «джигитлери» Къарачай-Черкесияны субъект къурагъан миллетлерини келечилеридиле. Хар бир миллет энчи «таурухда джашайды» – ала аманлыкъгъа къаршчы кюреш бардырадыла, урунадыла, башха таурухладан аманлыкъчыла келиб, Къобан сууну джабхынчы дери, ашхы адетлерини тамалында зауукъ эте джашайдыла. Ала, аманлыкъчыланы ишлерине къаджау турур ючюн, биригиб, миллетле арасы шохлукъну кючю уллу болгъанын кёргюзедиле.
Мультфильмни къурау бла уста команда кюреширикди. Авторла проектни белгили этер нюзюр бла, аны презентациясын республиканы шахарлары бла районларында бардырлыкъдыла. Мультфильм хазыр болса, Къарачай-Черкесияны школларында 1-чи – 6-чы классланы сохталарына «Разговоры о важном» деген проектни тамалындан кёргюзюрюкдюле.
Проектни толтурургъа КъЧР-ни Окъуу бла илму министерствосу эмда «Движение Первых» деген джаш тёлю къозгъалыуну Къарачай-Черкесияда бёлюмю болушлукъ этерикдиле.

(БИЗНИ КОРР.).