«Билим. Лектор» саулай Эресейде бардырылгъан конкурсну бешинчи чагъында тамада къауумну ичинде хорлагъанланы тизимин басмалагъанды «Билим» деген джамагъат бирлешлик. Эресейни 82 регионунда ол тизимге 516 адам киргенди.
Бу айда ала Москвада баш эришиулеге къошуллукъдула. Эксперт кенгеш хорлагъанланы атларын белгили этерикди.
Алчылыкъны алыр ючюн, Къарачай-Черкесияны лекторлары Черкесскеде Шимал Кавказ кърал академияны эксперт кенгешинде кеслерини билимлерин-болумларын кёргюзгендиле.
Алгъа «Архыз 24» телеканалны тележурналисти Хубийланы Людмила, РФ-ны Кърал Думасыны депутатыны болушчусу Амиран Дзугов, Къарачай-Черкес Республиканы байламлылыкъ бла коммуникацияланы игилендириуге джораланнган аралыгъыны директоруну борчларын толтургъан, аны баш редактору Батчаланы Мадина чыкъгъандыла.
Хубийланы Людмила профессионал журналистди, 13 джылны устаз болуб ишлегенди, джергили телевидениени ёсюмюне юлюш къошханы ючюн, КъЧР-ни Правительствосуну грамотасы бла эки кере саугъаланнганды.
Амиран Дзугов «Лига эрудитов» телевизион проектни авторуду, редакторуду, «Игра слов» клубну тамадасыды, «Билим» бирлешликни лекторуду.
Батчаланы Мадина КъЧР-ни махтаулу журналистиди, КъЧР-ни Джамагъат палатасыны члениди, КъЧР-ни Парламентини депутатыды, «Къралны тюрлендирген адамладыла» деген бютеу Эресейде белгиленнген миллет ёчню лауреатыды, РФ-ны Президентини ышаннгылы адамыды. Ол конкурсха «Медиаграмотность как главный навык в XXI веке» деген лекция бла къошулгъанды.
– Финалгъа чыкъгъанланы тизимин кёргенимде бек сейирсиндим. Аланы эм кичисине 22, эм улусуна да 64 джыл болгъанды. Аланы тогъузу аскер къау-
гъагъа къошулгъан адамладыла, 337 адам сууаблыкъ эмда джамагъат иш бла кюрешгенледиле. 18 адамны юйдегилерини келечилери «Билим» бирлешликни лекторларыдыла. Ала барысы да кеслерини бютеу кючлерин, билимлерин адамланы бирикдирирге, игиликге-ашхылыкъгъа бургъандыла. Мен аланы барысына да джетишимле теджейме, – дегенди «Билим» бирлешликни баш директору Максим Древаль.
Эресейни 200-ден аслам шахары бла элини адамлары финалда эриширикдиле, аланы 66 проценти окъуу эмда илму санагъатны келечилеридиле: ичлеринде илмуланы докторлары бла кандидатлары, Эресейни окъуу санагъатыны сыйлы къуллукъчулары бардыла. Аланы араларында кёб сабийлери болгъанла да тюбейдиле.
Тамада къауумдан алчы оруннга ие болгъан 110 адам «Билим» бирлешлик бла кесамат этерге эркинлик табарыкъды. Алай бла, хар ким кесини регионунда лектор болуб къуллукъ этерикди.
Алгъаракъда «Джаш лектор» номинацияда алчы орунлагъа 50 сохта бла студент ие болгъандыла, ала Эресейни 27 регионуну келечилеридиле.
Юбилей чакъны информацион джёнгерлерини атларын да айтайыкъ
– «Джулдуз» телерадиокомпания бла «ФедералПресс» медиахолдинг; «Cassiopеa» сыйлы ташла сатхан юй бла «Алгоритмика» окъуу-билим берген платформа.
Алайды да, бизни регионну адамлары, къралда окъуу-билим бла байламлы эм уллу организация бардыргъан конкурсха къошулуб, билимлерин, болумларын сынарыкъдыла.
Маралланы Ина.
