Бу кюнледе КъЧР-ни Башчысы Темрезланы Рашид республиканы табигъат байлыкълары бла экологиясыны хакъындан министри Къочхарланы Диана бла тюбешгенди.
Башчы бла министр экология болумну игилендириуге, хауа болумну тазалыгъын сакълаугъа, табигъат байлыкъланы аяулу хайырландырыугъа аталгъан миллет проектле бизни регионда къалай толтурулгъанларын сюзгендиле.
Тюбешиуде, къаты багушну къоратыу эмда джарашдырыу, чегетлени джангыртыу, суу объектлени сакълау дегенча джумушла да къошулуб, «Экологическое благополучие» деген миллет проектни тамалында къуралгъан федерал проектлеге тюшюрюлген ишле не заманнга, къалай баджарыла баргъанларыны юсюнден сёлешиннгенди. Суу джагъаланы бегитиб, аны кибик башха ишле этиб, табигъатны кючю бла болуучу чарпыуладан сакълар мадарлагъа айырылыб эс бёлюннгенди.
Анда айтылгъаннга кёре, быйыл бизни республикада суу джагъаланы бегитиуге аталгъан къурулуш ишле тири бардырыладыла. Ючкекенде Эшкакон сууну, Къарачай шахар округда Къобан бла Мара Аягъы сууланы джагъалары бегитилгендиле, Сторожевое станседе Кяфарь сууну, Къобан районда да Абазинка бла Овечка сууланы ызлары да тазаланнгандыла.
Быллай ишле келир джылда да бардырыллыкъдыла. «Ачыкъ эфирде» Темрез улугъа берилген сорууланы бири да бу джумушну юсюнден эди. Связгъа чыкъгъан джердешибиз Зеленчук районда сууланы джагъаларын бегитиуню къайгъысын этген эди.
Башчы бла министр чегетлени отдан сакълаугъа, аланы джукъаргъан джерлерине джаш терекле орнатыугъа аталгъан ишлени эсеблерин да сюзгендиле. Республикада аллай джумушла тыйыншлысыча баджарылгъанлары, бютеулей да 124 гектарда чегетле джангыртылгъанлары чертилгенди.
«Иги экология болум – джердешлерибизни саулукълу джашарларыны эмда туризм санагъатыбыз ёсюм алырыны тамалыды.
ТКО-ну къурутурукъ объектлени къурулушларына, иш этиб къуралмагъан джерлеге багуш атмазча этиу бла байламлы белгиленнген ишле къалай баджарылгъанларына къарагъанлай турургъа керекди. Бюгюнлюкде «Экономика замкнутого цикла» деген джангы федерал проектни толтуруугъа да аслам эс бёлюнеди. Ол джараусуз затланы джангыдан джарашдырыугъа аталгъанды. Бу проект тыйыншлысыча толтурулса, къаты багушну заманны излемине келишген джорукъ бла къурутуб барлыкъбыз», – дегенди Темрезланы Рашид.
