Эресейни Ич ишлерини къуллукъчуларыны кюнюню аллы бла Черкесскеде «Алые паруса» деген реабилитацион аралыкъны спорт залында «Спорт. Полиция. Сабийле – 2025» деб кёзюулю спартакиада бардырылгъанды.

Бу эришиулеге эки команда къошулгъанды: аланы капитанлары Эресейни Ич ишлерини министерствосуну акъыл-балыкъ болмагъанла бла байламлы Черкесск шахар бёлюмюню къуллукъчулары болгъандыла.
– Бу спартакиада быйыл бизни республикада онбиринчи кере бардырылады. Спорт оюн къыйын джашау болумгъа тюшген сабийлеге эс табдырады эмда аланы бирикдиреди, – деб чертгендиле Къарачай-Черкесияны Ич ишлерини министерствосуну пресс-къуллугъунда.
Къууанч халда ачылгъан спорт эришиуледе алчы орунлагъа ие болур иннет бла командаланы адамлары къадалыб кюрешгендиле. Жюрини къурамына Ич ишлени министерствосуну джергили бёлюмюню джамагъат советини келечилери эмда «Алые паруса» реабилитацион аралыкъны къуллукъчулары киргендиле. Эки команда да бир-бирлерине ал бермей кюрешгенлерин эсге алыб, жюри экисин да хорлагъаннга санагъанды.
Алагъа кубокла, дип-ломла, ашаргъа джараулу татлы затла берилгендиле.

Маралланы Ина.