Адамлагъа Доммайны сейир табигъатыны хайырлылыгъы уллуду. Джюрекде къууанч гюлле чакъдыргъан мийик таула, чегетле, чокъуракъ суула кёбдюле. Кюн таякъла джылыта, джашил талалада буу балала ойнайдыла. Таза хауа адамгъа учунмакълыкъ бере, ашхы сезимле къозгъаладыла.

Акъ шоркъалы суула мийикледен агъадыла. «Шайтан тирмен» (Чертова мельница» чучхур да аллай сейирликлени бириди. Тебленнген джаяу джолчукъ бла Доммайны къыбыла джанындан Аманаууз ёзенни 1,5 километрни баргъан адам аны юсюне чыгъыб къаллыкъды. Аманаууз суу, мийик тик къаяладан секириб, тар джерле бла бурулуб, къайнаб, кесин къая ташлагъа уруб боркъулдай барады. Аны чорт кесилген мийик къаяны башындан къараб кёрюрге болады.
«Шайтан тирмен» чучхур Аманаууз суудан къуралгъан 25 метр мийикликден секиреди. Аны кенглиги 3 метрге дериди. Джай, сууу кёб болса, джайылады, къыш, къарла, бузла эримеген кёзюуде, джыйылады. Бу чучхур тенгизден 1750 метр мийикликдеди. Аны эки джаны бла мийик таулада, къаялада къалын чегетледе бек эртдеги тюрлю-тюрлю терекле ёседиле. Ала асыры мийикден, къалындан тюблерине кюн аз тиеди. Алай болса да, джашил ханс, кёкенле, гоккала ёседиле. Былайда хауа дарманлыды, адам тоялмай кёкюрегин толтуруб солуйду. Ёзеннге саркъыб, джырлай баргъан акъ сууладан алыб ичеди, олтуруб, несин да унутуб, ариулукъгъа къарайды.
Бу чучхургъа барыб къайтханны, къайгъысы кетиб, санлары дженгил болуб, джюрегинде рахатлыкъ орналады. Ол, ашхы сезимледен толуб, таукел, тири болуб, къууанады.

Узеирланы Хусей.