Бизни джердешибиз Айбазланы Юсюпню джашы Солтан адабият эришиуде биринчи орунну алгъанды.
Айбаз улу 1949-чу джыл Къыргъыз ССР-ни Ленинполь районуну Водное элинде туугъанды. 1974-чю джыл Москвада архитектура институтну бошагъанды. Джёгетей Аягъы районну баш архитектору (1974-чю – 1999-чу джылла), Къарачай-Черкес Республиканы баш архитектору, республиканы къурулушну, коммунал мюлкню хакъындан министрини орунбасары (1999-чу – 2013-чю джылла) болуб ишлегенди. Бусагъатда Черкесск шахарда джашайды.
Республиканы шахар къурулуш бла архитектурасын игилендириуге аталгъан программала джарашдыргъанды. Аланы джашаугъа сингдиргенди. Архитектураны Москва шахарда бардырылгъан «Зодчество 2007», «Зодчество 2010» деген халкъла арасы фестивалларыны «Регионы России» номинацияларына республиканы архитектурадан экспозициясын къошханды.
Айбазланы Солтан РФ-ны Джазыучуларыны эмда Архитекторларыны союзларыны, Кавказны джазыучуларыны клубуну да къурамларындады. КъЧР-ни махтаулу архитекторуду, РФ-ны сыйлы архитекторуду.
Аны энчи проектлери бла 50-ге джууукъ комплексле эмда кёб этажлы мекямла ишленнгендиле. Айбазланы Солтан Къарачай шахарда салыннган, Къарачайны кёчгюнчюлюгюне аталгъан мемориалны авторуду. Москва шахарда ётген «Зодчество 2006» деген халкъла арасы фестивалны-кёрмючню лауреатыды (алтын диплом). Ага-Хан принцни премиясыны номинантыды (2007-чи джыл). Ол «Зодчество 2007» фестивалны жюрисини къурамына да киргенди.
2011-чи джыл Шимал Кавказны Архитектура бирлешлиги бардыргъан биринчи фестивалда Къарачайны 1943-чю – 1957-чи джыллада сюргюнюне аталгъан музейни проекти ючюн къарнашла-архитекторла Бернардаццилени медалларыны диплому бла саугъаланнганды.
2024-чю джыл адабият бла архитектурада джетишимлери ючюн, (адабиятда – «Къара атлы» китабы, архитектурада – къарачай миллетни 1943-чю – 1957-чи джыллада сюргюнюне аталгъан, Къарачай шахарда салыннган мемориал) Кърымшаухалланы Исламбийни медалы бла саугъаланнганды.
Къарачай тилде чыкъгъан талай китабны авторуду. Адабият бла гитчелигинден бери кюрешеди. Биринчи хапары къарачай газетде школда окъугъан заманында огъуна басмаланнганды. Джыйым китаблада, журналлада къарачайча, орусча да басмаланнганлай тургъанды. Нальчикде «Минги тау» журналда талай хапары, «Акъ къаяла» повести басмаланнгандыла. Москвада орус тилде чыкъгъан «Литературные знакомства», «Пять стихий» журналлада талай хапары чыкъгъандыла. Орус тилде басмагъа «Белые скалы», «Чёрный всадник» китабланы хазырлагъанды.
Айтханыбызча, Солтан кёб болмай чечен литератураны тамалын салгъан С. Бадуевни аты бла бардырылгъан III-чю литература конкурсда биринчи оруннга ие болгъанды.
