Къобан районда Кавказский посёлокну школуну директоруну болушчусу, сохталаны насихат джаны бла юретиучю, классланы башчы устазлары сохталары бла бирге акция бардыргъандыла.

Ала СВО-да аскерчилерибизге – бетджанлада къыйын хыйсаблада тургъанлагъа – себеблик болурлай, болушлукъ этер нюзюр бла, джау чыракъла хазырлагъандыла.
– Хар бир джау чыракъны юсю бла сабийле аскерчилерибизге къуру джылыуну эмда джарыкъны ёзеги болуб къалмай, джюрек джылыуларын бергенлерин, аланы унутмагъанларын билдиредиле. Быллай ашхы ишлери бла сабийле кеслерини бирикген кючлерин эмда патриотлукъ сезимлерин кёргюзедиле. Ата джуртну джакълагъанлагъа болушлукъ этерге хазыр тургъан шартлары барыбызны да бек къууандырадыла, – дейди директорну болушчусу, насихатчы Бердиланы Гюльстан.
Эсигизге салыргъа излейбиз, мындан алда КъЧР-ден СВО-да къуллукъ этген джашларыбызгъа кёзюулю гуманитар болушлукъ – джангы джыйылгъан 11 тонна бачха, тахта кёгетле – ашырылгъан эди. «Бирикген Эресейни» регионал бёлюмюнде билдиргенден, аны Эресей Федерацияны сенаторлары – къоруулауну эмда къоркъуусузлукъну хакъындан комитетни председателини орунбасары Виктор Бондарев, ол комитетни къурамына киргенле Алексей Наумец бла Крым Казаноков, «Хаммер» фирма хазырлаб ашыргъан эдиле.
Чертерге тыйыншлыды, аскерчилерибизге эмда аланы юйдегилерине болушлукъ этиу джаны бла бютеу джумуш КъЧР-ни Башчысы Темрезланы Рашидни аманаты бла къуралгъан Бирикген республикан оператив штабны чегинде баджарылады.

БОКАЙЛАНЫ Ф.