Абыстол (ноябрь) айны 1-ден 8-не дери саулай Эресейде X-чу кере «Большой этнографический диктант» деген акция бардырылгъанды. Аны Миллет ишлени хакъындан федерал агентство къурагъанды.

«Большой этнографический диктант» деген акциягъа къошулгъанла Эресейни миллетлерини маданиятлары эмда адетлери бла байламлы билимлерин сынагъандыла.
Ол акциягъа, адетдеча, Къарачай-Черкесия да тири къошулгъанды. Джердешлерибиз диктантны юч ара площадка бла 26 окъуу заведениеде джазгъандыла.
Абыстол айны 6-да Байчораланы Мариям атлы тарих-маданият эмда табигъат музейде-заповедникде баш площадка ачылгъанды. Анга тюрлю-тюрлю организацияланы къуллукъчулары, аскер къаугъаны ветеранлары, сохтала, джамагъат къуллукъчула къошулуб, билимлерин сынагъандыла.
Къарачай шахарда уа «Большой этнографический диктант» деген акция Алийланы Умар атлы Къарачай-Черкес кърал университетни табигъат-география факультетини мекямында бардырылгъанды.
Аны бла бирге диктантха www.miretno.ru бла национальнаяполитика.рф сайтлада онлайн халда къошулур мадар да бар эди.
Диктантха къошулгъанлагъа сертификатла берилгендиле. Аны эсеблери эндреуюк (декабрь) айны 12-де, РФ-ны Конституциясыны кюнюнде, чыгъарыллыкъдыла.

(БИЗНИ КОРР.).