Мындан алда «Къарачай-Черкес Республиканы Джигитлери» атлы билим ёсдюрген программаны тамалында кёзюулю акция ётгенди. Аны СВО-ну ветеранларына болушлукъ этерлей эмда джаш адамланы патриотлукъгъа юретиуде уллу магъанасы болурлай нюзюр бла бардыргъандыла.

Бу джол СВО-ну ветеранлары, республиканы джаш адамлары, башхала да къошулуб, бютеулей 30 адам къуралыб, таулагъа джаяу джолчукъла бла ёрлеб джолоучу болгъандыла.
– Бу тукъум кёзюулю акцияланы хар джыл сайын да этиучен эдик. Бу джол аны программасын къурагъанла бла бирге Къарачай-Черкесияны джаш тёлюсюнден да кёбле къошулгъандыла. Бу джыйылыуну магъанасы бек уллуду. Ол да недеди десегиз, СВО-ну ветеранлары джаш адамлагъа къыйын кёзюуде джунчумай къоркъууладан тыйыншлы ётерлей, не тюрлю къыйын хыйсабланы да кёлтюрюр ючюн, санларын чыныкъдырыргъа, Ата джуртлары салгъан борчну толтурургъа джууаблы болгъанларын ангылатадыла, юлгюле келтириб хапар айтадыла. Алайды да, быллай акцияланы кёбюрек бардыра турургъа кереклиси хакъды. Ала джаш тёлюню тин-иннет байлыгъын айнытыргъа, патриот сезимлерин бегитирге уллу себеблик этедиле. Олду бу акцияны баш мураты да, – деди КъЧР-ни Джаш тёлю ишлени хакъындан министерствосуну патриотлукъгъа юретген бёлюмюню тамадасы Ёртенланы Азнаур.
Чертерге тыйыншлыды, башында сагъынылгъан программаны тамалында бу тукъум джыйылыу алтынчы кере бардырылады. Аллында ётген джыйылыулада джаш адамланы арасында командала къуралыб, аланы билимлерин ёсдюрюу джаны бла талай магъаналы джумуш этилген эди: спорт эришиуле бардырылгъан эдиле, джаш адамла Эресейни Илмула академиясыны Тёбен Архызда аламгъа къарагъан обсерваториясын джокълагъан эдиле, Кавказны фашист зулмучуладан азатланнган кюнюне аталгъан экскурсияла къурагъан эдиле.

БАТЧАЛАНЫ Фатима.