Абыстол (ноябрь) айны 3-ден 9-на дери Доммай посёлокда Регионал кинематографха кёлтюргючлюк этген фондну «Кавказская Кинолаборатория полного цикла» деген окъуу программасы бардырылгъанды. Ол КъЧР-ни Маданият министерствосуну болушлугъу бла къуралгъан эди.
Окъуу программагъа Буденновск, Владикавказ, Махачкъала, Минводы, Нальчик, Ставрополь, Черкесск шахарладан дагъыда Кавказны башха джерлеринден джаш режиссёрла бла сценаристле къошулгъан эдиле.
Кинолаборатория регионлада кинематографны айнытыргъа джораланнган программады. Анга къошулгъанла джети кюнню ичинде кино тюшюрюуню джорукъларын, режиссёр ишин къалай къураргъа кереклисин, кинону трейлерин хазырлауну юсюнден дерследе билимлерин ёсдюргендиле.
Джаш адамла окъуу программаны тамалында лекциялагъа, энчи консультациялагъа къошулгъандыла, ингир сайын кинолагъа къараб, аланы устала бла сюзгендиле. Кинолабораториягъа бюгюннгю эресейчи кинону усталары – ВГИК-ни тауусхан, документли кинону устасына саналгъан, ишлери Эресей эмда халкъла арасы дараджалы фестиваллада алчы орунланы алыб тургъан Владимир Головнев; монтажны режиссёру, «Докер» эмда «Окно в Европу» деген фестивалланы лауреаты, «Золотой орел» эмда «Ника» саугъаланы иеси Константин Ларионов; кинорежиссёр, монтажны режиссёру Игорь Морозов – насихатлыкъ этгендиле.
Кинолабораторияны ахыр кюнлери питчингге (проектни къысхасы бла презентация этиуге) аталгъанды. Репетициягъа эмда проектлени джакълаугъа режиссёр эмда насихатлыкъ этген Анастасия Тарасова, режиссёр, продюсер, Владикавказда «Нарт-Арт» деген студияны директору Темина Туаева, программаны креатив продюсери Ирина Шаталова келген эдиле.
«Шимал Кавказны регионларындан тилек къагъытла азыракъ келселе да, аланы хар биринде учунмакълыкъны кёресе. Адамла айтыргъа излегенлерин ачыкъ этер ючюн къошуладыла кинолабораториягъа. Ары теджелген ишлени арасында къысха документли киноладан уллу метражлы оюн кинолагъа дери кёрюрге боллукъду. Аланы хар бири кино тюшюрюлген джер бла, алайыны адетлери бла терен байламлыды. Биз да авторлагъа кёл берирге, болушургъа излейбиз», – дейди лабораторияны креатив продюсери Ирина Шаталова.
Проектлени джакълаугъа КъЧР-ни маданият министри Зураб Агирбов да къошулгъан эди. Ол джаш адамлагъа кинолабораторияны магъанасы уллу болгъанын чертгенди, анга къошулгъанлагъа джетишимле теджегенди.
Алайды да, устала юч проектни хорламгъа тыйыншлы кёргендиле: 1-чи орунну «Город летающих пакетов» деген иши бла Гаджимурад Эфендиев (Дагъыстан), 2-чи орунну «Где Гиччи?» деген ишлери бла Патимат Алиева бла Александра Мельник (Дагъыстан), 3-чю орунну «Двойная жизнь Мадины» деген иши бла Ольга Юнашева (Терк Башы Тегей) алгъандыла.
«Кинолаборатория полного цикла» деген окъуу программала къралыбызны федерал округларыны барында да ётгендиле. Регионал кинематографха кёлтюргючлюк этген фонд Кавказда бардырылгъан кинолаборатория бла 2025-чи джыл регионлада тюбешиулени тамамлагъанды.
(БИЗНИ КОРР.).
