Эресейни МВД-ны Хабез районда бёлюмюню къуллукъчулары банкдан ачха урланнганы бла байламлы терслеу ишни тинтедиле. Ол аманлыкъ ишни юсю бла 48 джыл болгъан бир тиширыу терсленеди.

Белгили болгъаннга кёре, быйыл къыркъаууз (сентябрь) айда ол тиширыу джашыны банк счётундан кредит картагъа ай сайын тёленнген ачха ашыргъанды. Ачха кредит картагъа тюшсе да, счётдан кетмегенин эслегенди тиширыу. Алай болса да, ол джашыны счётундан аны башха картасына бир кесек ачха ашыргъанды. Биягъынлай, ачха счётдан кетмегенин кёргенди.
Банкны приложениесинде кемликле болгъанын ангылаб, тиширыу джашыны счётундан энтда 212 транзакция этгенди. Финанс учреждениеде кемликле бла хайырланыб, тиширыу ол халда джашыны картасындан кетген да этмегенлей 1,8 мелиуан сомну башха счётха ашыргъанды.
Полицияны къуллукъчулары тиширыуну тутхан заманларында анда урланнган ачхадан 600 минг сом къалгъанын ачыкълагъандыла. Тиширыу айтхандан, къалгъан ачханы кредитин джабаргъа, кийимлеге, кафеге джойгъанды.
Бюгюнлюкде РФ-ны Терслеу кодексини 158-чи статьясыны 4-чю кесегине кёре ол тиширыугъа ачылгъан терслеу ишни тинтиу барады.

КъЧР-ни МВД-ны пресс-къуллугъу.