Халкъ бирликни кюнюнде Къобан районну Кавказский посёлогунда къууанч халда сквер ачылгъанды. 400 метрге джууукъ аллеяны «Комплексное развитие сельских территорий» эмда «Формирование комфортной городской среды» деген программаланы тамалында джарашдыргъандыла.

– Былайда джашагъан адамла, бютюн да къартланы кенгеши, паркга «Уллу Ата джурт къазауатда Хорламны 80-джыллыгъына» деб атаргъа тыйыншлы кёргенлерин билдиргендиле. Ол оюмну Къарачай-Черкес Республиканы Башчысы Темрезланы Рашид да къабыл кёргенди, – деб чертгенди Къобан районну администрациясыны башчысы Семенланы Ахмат, джыйылыуда сёлешиб.
Байрамгъа КъарачайЧеркесияны Правительствосуну Председателини орунбасарыны борчларын толтургъан Орусланы Марат бла КъЧР-ни эл мюлк министри Биджиланы Умар да къошулгъандыла.
Паркны джаяу джолчукъла, сабий майданчыкъла, кечеги лампала артыкъ да омакъ этедиле. Сёзсюз да, былайы уллуланы, гитчелени да кесине тартхан джер боллукъду. Аны бла бирге кёб тюрлю маданият, спорт эришиулени, джыйылыуланы бардырыргъа да мадар боллугъун чертерге тыйыншлыды.
Ол кюн район аралыкъда, Ата джуртну къоруулаучуну кюнюне багъышланыб, Хорламны фестивалы да бардырылгъанды. Районну джамагъаты аскер къаугъагъа къошулгъанлагъа джараулу затланы хазырлау бла байламлы мастер-класслагъа, аскер-спорт эришиулеге, сурат кёрмючге, сабийлени хунерлик ишлерине, концертге къарагъандыла.
Айхай да, районда джашагъан миллетлени хантларындан толгъан тепсилени тёгереклерине да джыйылгъандыла байрамгъа къошулгъанла. Айтыргъа, Халкъ бирликни кюнюнде Къобан районну джамагъаты, къралыбызны тарих джолундан хапарлы да болуб, миллетлени арасында шохлукъну не къадар бегитирге кереклисин да ангылаб, солугъан да этиб, бир-бирине игилик-ашхылыкъ да теджеб чачылгъанды.

Маралланы Ина.