Мындан алда Шимал Кавказ кърал академияны студентлери, Халкъ бирликни кюнюне атаб, Гоначхир ёзенде къысха метражлы кино этгендиле. Анда «Смуглянка» деген белгили джыр орус, къарачай, къытай тилледе джырланнганды.

«Джаш адамла джырны бир джолгъа орус, къарачай, къытай тилледе джырлагъандыла. Ол, бизге къуру къысха метражлы кино болуб къалмай, адамланы шох этген, халкъланы бирикдирген, аланы арасында маданиятны, чыгъармачылыкъ байламлылыкъны бегитген, тенгликни, шохлукъну магъанасын, багъасын кёргюзген, тарих адетлени ангыламакълыкъны кючюн эсгертген мадар болду. Къытай тилде джырланнган куплет Эресей бла Къытайны арасында орун алгъан шохлукъну кючюн кёргюздю. Бизни къралларыбыз бурундан бери да хоншу джашайдыла, ала тарих эмда маданият джаны бла байламлыдыла», – дегенди бу баш окъуу заведениени ректору Къочхарланы Руслан.
Бу кино республиканы эм ариу джерлерини биринде – Тубанлы кёлню – къатында тюшюрюлгенди. Алайда гюллю талала, мийик таула, къалын чегетле, терен ёзенле, адамны кёзюн алдай, ариулукълары бла кинону халын сейир этгендиле. Къарачай-Черкес Республика Эресей Федерацияны кёб миллетли субъектлерини бириди. Анда 100-ден аслам миллет джашайды. Аланы бешиси – оруслула, къарачайлыла, черкеслиле, абазалыла, ногъайлыла – субъект къурагъан этносладыла.
Былайда, шохлукъну, тенгликни, къарнашлыкъны кючю бегиб, мамыр, рахат джашау орун алгъанды.

Лепшокъланы Хусеин.