Бу кюнледе республикан аралыкъда, Халкъ бирликни кюнюне аталыб, фестиваль бардырылды.

Ол кюн Эресейни кючю, аны халкъларыны биригиулеринде, бир-бирин ангылауларында болгъанын эсгерте, къралыбызны адамларын шох этген иш этилди.
Черкесскеде сейир программалары болгъан байрам площадкала къонакъланы, джергили джашагъанланы кеслерине чакъыра эдиле.
Республиканы халкълары биригиб, кёб ашхы зат къурадыла. Былайда республиканы халкъларыны адетлерин, кийимлерин, миллет хантларыны байлыкъларын, башха ашхы затларын кёрюрге боллукъ эди. Тюрлю-тюрлю темалагъа аталгъан мастер-классла бардырыла, адамланы бирикдирдиле.
«Знание. Россия – народы России» деген сурат кёрмюч къуралды. Ол бизни къралны кёб халкъларыны маданият байлыкъларына аталыб, тарих эсни кючюн бегите эди. Ариу музыка, тюрлю-тюрлю тилледе джырлагъан артистлени ауазлары адамланы рахатлыкъгъа, къууанчха бёлей эдиле.
Черкесскени ара майданында 200 сабий шахарны адамларын Халкъ бирликни кюню бла алгъышладыла.
Бу джарыкъ байрам юйдегилени, джаш тёлюню, шахарны къонакъларын, ашхылыкъны, игиликни, шохлукъну, сюймекликни тамалында бирикдире эди.
Ол кюн быллай байрам ишле Къарачай-Черкес Республиканы бютеу шахарларында, эллеринде бардырылгъандыла. Адамла бу къууанч байрамгъа – Халкъ бирликни кюнюне – тири къошулгъандыла. Аны аллы бла республикада «Большой этнографический диктант» джазгъандыла. «Ночь искусств» деген иш, «тёгерек столла», интерактив тарих дерсле бардыргъандыла.