Эресейни Социал фондуну Къарачай-Черкесияда бёлюмю быйыл джылны аллындан башлаб, республиканы 524 адамы санаторийледе, курортлада саулукъларын багъарлай бютеулей 18 мелиуан сомдан аслам багъасы путёвкала бергенди.
Уллу Ата джурт къазауатны ветеранларыны, аскер къаугъалагъа къошулгъанланы, аланы юйдегилерини, сакъатланы, «Жителю блокадного Ленинграда» белги бла саугъаланнганланы, Чернобыль АЭС-де джарсыгъанланы эмда башхаланы барды эркинликлери башында теджелген путёвкаланы алыргъа.
Путёвка бла бирге льготалары болгъан адамгъа ачха джоюм этмегенлей тохтар джерине дери барыргъа эмда ызына келирге хыйсаб бериледи. Ол мадарла бла толу хайырланыр ючюн, соцпакетни джарашдыргъан кёзюуде джолгъа джоюмланы юсюнден теджелген мадаргъа эс бёлюб, аны да сакъласа керекди.
– Эресейни Социал фондуну бизни регионда бёлюмю хар джыл сайын кърал дараджада кесаматны къайсы курорт шахар бла этсе, ары ашырады. Санаторийге, курортха барыргъа керекли адамла саулукъларына, аурууларына кёре кёзюуге салыныб, алай джазыладыла. Ол къаты джорукъду. Аны себебли, быйыл биз льготалары болгъан къауумну саулукъларын багъаргъа Къабарты-Малкъарда, Кърымда, Ставрополь крайда санаторийлеге ашыргъанбыз, – деди Социал фондну Къарачай-Черкес Республикада бёлюмюню тамадасы Аслан Озов.
Башында сагъынылгъан путёвканы алыр ючюн алгъы бурун саулугъуна къарагъан врачындан анга тыйыншлы къагъытны (справка 070/у) джарашдырыб алыргъа керекди. Андан сора «Госуслуги» порталда неда МФЦ-да, неда почта бла, алай болмаса, Социал фондну бёлюмюнде тилек къагъыт джазыб, санаторийде солур эркинлиги бла хайырланыргъа излегенин билдирирге керекди. Алай бла, СНИЛС документини номери бла, социал фондну официал сайтында «Гражданам» деген бёлюмюню «Очередь на санаторно-курортное лечение» атлы къошакъ бёлюмюнде къараб, адам кесини кёзюую къачан джетерин билирге боллукъду.
Адамла бла байламлылыкъ джюрютюу ишлени хакъындан бирикген аралыкъны бизни регионда бёлюмю баш кюнден байрым кюннге дери 8 сагъатдан 17
сагъатха дери ишлеб турады. Аны юсюнден толу хапар билирге излеген дагъыда башха соруулары болгъан адам телефон бла 8 (800) 100-00-01 номерге къонгурау этерге мадары барды.
Эресейни Социал фондуну КъЧР-де бёлюмюню кёбчюлюк информация мадарла бла
байламлылыкъ джюрютюуню хакъындан бёлеги.
