Бу кюнледе Къарачай-Черкесияны Правительствосуну Председателини биринчи орунбасары Смаккуланы Дагирни башчылыгъы бла хар нени багъасын онлайн эмда карта бла тёлеуню сингдириуню хакъындан ведомствола арасы ишчи къауумну кенгеши болду.

Анга республиканы экономика ёсюмюню министри Артур Езаов бла толтуруучу власть органланы башха къуллукъчулары, банкланы келечилери къошулдула.
Ала хар нени багъасын онлайн эмда карта бла тёлеуню файдалыгъыны быйылгъы кёргюзюмлерин, ол амал бла муниципал къуралышлада къаллай бир адам хайырланнганын сюздюле.
Кенгешге къошулгъанла школлада ашарыкълагъа онлайн эмда карта бла тёлер мадарла къураугъа, базарлада терминалланы хайырландырыугъа да эс бёлдюле.
Ахырында онлайн эмда карта бла тёлеуню сингдириу бла байламлы муниципалитетле бардыргъан ишлени эсеблерин чыгъардыла, ол халда 2025-чи – 2027-чи джыллада Къарачай-Черкесияда сатыу-алыу кёргюзюмлени ёсдюрюуню планы къалай толтурула башлагъанына да къарадыла.
Бу мадарла бары да регионну цифра дараджасын ёсдюрюуге, адамланы финанс ишлерин табыракъ этиуге аталгъандыла.