Бу кюнледе КъЧР-ни Башчысы Темрезланы Рашид РФ-ны Кърал Думасыны Къарачай-Черкесиядан депутаты Ёзденланы Солтан бла тюбешгенди.

Ала республикада джашагъанла тюбешиуледе берген сорууланы, Къарачай-Черкесияны социалэкономика ёсюмю бла байламлы ишлени сюзгендиле.
Ёзденланы Солтан республиканы джамагъаты бла тюбешиулерини юсюнден хапар айтханды. Ол айтханнга кёре, адамланы кёбюсю социал болушлукъ, улоу эмда коммунал инфраструктураны игилендириу эмда ишге кириу бла байламлы соруула бередиле. Ёзден улу хар тилекге эмда джарсыугъа заманында эс бёлюу, берилген буйрукъла къалай толгъанларына къарау биригиб ишлеуню тамалы болгъанын чертгенди.
Тюбешиуде аскер къаугъаны ветеранлары бла аланы юйдегилерине болушлукъ этиуге уллу эс бёлюннгенди. Аскерчилеге социал болушлукъ, реабилитация, медицина эмда психология болушлукъ этиуню магъанасы уллу болгъаны чертилгенди. Аланы юйдегилерине болушлукъ этиу мадарланы таймаздан кенгертиб турургъа эмда аланы джарсыуларына тыйыншлы эс бёлюрге кереклиси да айтылгъанды. Бусагъатда да Ёзденланы Солтан гуманитар джюкле джыйыу бла кюрешген штабны ишине тири къошулады.
Темрезланы Рашид Ёзденланы Солтаннга, ишин деменгили баджаргъаны ючюн, разылыгъын билдиргенди.
«РФ-ны Кърал Думасыны депутатлары, Федерация Советни сенаторлары бла биригиб ишлегенибиз эмда республикада джашагъанла бла къысха байламлылыгъыбыз джердешлерибизни джашау дараджаларын игилендирирге мадар береди», – дегенди Темрезланы Рашид.