Ата джуртубузгъа аталгъан назмула
ЭРЕСЕЙ
Ата джуртум Эресей, сен –
Тюзлюкню анасы,
Джюз миллетни бирлешдирген
Къадама къаласы.
Мийик таула, узун суула,
Тюзлеринг а – чексиз,
Эресей, Эресей, сени
Сюеме мен кемсиз.
Къыйын кюнде сыйын, джерин
Джауладан къоругъан,
Шохларына билек бериб,
Джаны бла джакълагъан.
Учхан къушдан тюк алыучу
Аждагъан джашларынг,
Джетген джерге джан салыучу
Айджаякъ къызларынг.
Кёб джылны туздам бердиле
Чомарт, берч къолларынг,
Джюрегим бла ётдюле
Сени кенг джолларынг.
Эресей, Эресей, джаным,
Тыбырым, арбазым,
Акъ къайынларынгы джырын
Алгъанды ауазым.
Мийик таула, узун суула,
Тюзлеринг а – чексиз,
Эресей, Эресей, сени
Сюеме мен кемсиз.
Сюйюнчланы Азамат.
Анабызды джерибиз
Тауда туугъан гокка хансчыкъ
Эртден чыкъда ёседи.
Акъ къайынны джаратыб,
Булбул джырын тёгеди.
Къалын чегет ичинде
Шошлукъ кючлеб джюрекни,
Ариу, ингил сезимле
Туудуралла тилекни.
Анабызды джерибиз –
Акъ къайын терекчикди,
Манга сыйлы Эресей
Ёмюрлюк сюймекликди.
– Ненча джыл джашарыкъма? –
Деб гугукга сорурма.
Гокка ханс бла таш салыб,
Наныма джолугъурма.
Четенде къаууз балдан
Сайлаб юлюш алырма.
Джулдуздан толу кёкде
Танга дери къалырма.
Анабызды джерибиз –
Акъ къайын терекчикди,
Манга сыйлы Эресей
Ёмюрлюк сюймекликди.
Петр Андреев.
(Къарачай тилге
Мамчуланы Дина кёчюргенди)
ЭРЕСЕЙГЕ ДЖЫРЛАЙМА
О, Эресей, хурметлиди уллу джеринг,
Байланыбды сени бла таулу кёлюм.
Салам санга, Минги Таудан исси салам,
Насыбына къууанады халкъым тамам.
Сабийлигим, джашлыгъым ётед сенде,
Къартлыгъым да рахатлыды кюнлю джерде.
Тауларымы джарыталла акъ тангларынг,
Джюреклеге нюр тёгелле адамларынг.
Уруш бизни туугъан джерден айыргъанда,
О, Эресей, унутмадынг ол заманда,
Джол кёргюзте, чыгъаргъаненг джарыкъ тангнга,
Аны ючюн минг бюсюреу этебиз санга.
Мен кёреме Къарачайны джашнагъанын,
Эресейни ата кёзден къарагъанын.
Джашынг кибик, кёзлеринге шош къарайма,
Сюйген джуртум, Эресей деб, мен джырлайма.
Берекетди Эресейни хар бир джери,
Туздам бла тюбейдиле шахары-эли.
Къарнашлыкъгъа эм шохлукъгъа сый берелле,
Эшиклени хар миллетге кенг керелле.
АКЪБАЙЛАНЫ Азрет.
АТА ДЖУРТХА
Ким да айтырыкъ затны айтама,
Ким да айтырыкъ – хар къызынг, джашынг.
Ата джуртум, къаллай эсенг да,
Сюеме сени, джюрегим талпый.
Сени атынг бла, кириб урушха,
Мен да къобханем къыйын кюнюнгде,
Этмегенме сеннге гурушха,
Сени атынг бла терсленнгенимде.
Сен тюл эдинг терс. Сени да теблеб,
Бизни да джойгъан болдула бирле.
Онтёрт джылны болушлукъ излеб,
Дыгалас бла ётдюле кюнле.
Сени ючюн болур, сау къалгъаным да,
Къыйынлыкъны чыгъыб тюбюнден,
Эшта, джарарыкъ болурма энтда
Керек болсам сеннге бир кюнде.
Кёбню кёрюб, кёбню да чегиб,
Айтыргъа излейме бюгюн халкъыма:
Ата джуртха гурушха джокъду,
Ол терс болмайды адамларына.
Байрамукъланы Халимат.
Джол ачарыкъ бирликди
Эркиндиле Эресейни джерлери,
Калининграддан Камчаткагъа деричи.
Ал эшиги Европада ачылад,
Арт эшиги Камчаткада салыннганд.
Кёб миллетле джашайдыла къралымда,
Тенгиз джагъада, таулада эм къырлада,
Кими джашайд кёб санлы шахарлада,
Кими турад тау этегин багъалата.
Бирикмеклик болад джашау тамалы,
Бир болсунла къралны бютеу халкълары,
Ичлеринде къурч тамырлы Къарачай,
Арырыкъса барын бирден сен санай.
Эресейни тутуругъу – миллети,
Ашхылыкъгъад хар бирини иннети,
Джашайдыла дагъан бола бир-бирине,
Ëрге тура кърал джакъларгъа керек кюнде.
Шохлукъ болсун миллетледе ал сафда,
Джылыу къурур ансыз саулай къралымда.
Джер, хауа да бу дунияда эркинди –
Рахатлыкъгъа джол ачарыкъ бирликди.
Шыдакъланы Зарима.
ДЖУРТУМ ДЕСЕМ
Сюймекликге анча джырны атаргъа
Тартыннганча этедиле къылларым.
Сезим къонса, къайда къарыу тохтаргъа:
Инджиуледе сёзюн излейд къаламым.
Кюрме эшиб, тухтюйлени тизеди
«Джуртум» деген сейир сёзню макъамы.
Хар бир джаннга татлы болса излейди,
Бюртюгюча къара джылгъы джырнаны.
«Джуртум» десем, Къарачайды эсимде,
Тарихинде тёрт дуния шыбырдай.
«Джуртум» десем, Къобанымды эсимде,
Толкъунлары, насыбымча, джылтырай.
«Джуртум» десем, тау Малкъарым эсимде,
Юйюрсюнюб, бир байракъгъа джыйылгъан.
«Джуртум» десем, Минги Тауду эсимде,
Юллесинден кёк булутла джайылгъан.
«Джуртум» десем, эл къабырла эсимде,
Хоншум, тийрем, къулакъ къакъгъан межгитле.
...Салынса да он къралда эсгертме,
Джуртсуз ёлген саналады харибге.
АКЪБАЙЛАНЫ Харун.
