Ермоловкада джергили чегет мюлкню устасы Евгений Ягодка 35 джылына талай окъуу учреждениени дипломун алгъанды, талай ишни ауушдургъанды. Алай а, кесини усталыгъын, къадарын да туугъан Зеленчук районунда табханды.

… Евгенийни учсуз-къыйырсыз чегетледе излерге керек болмадым. Ол «Зеленчукский лесхоз» РГУП-ну баш офисинде компьютерни джанында олтуруб, ишлей тура эди. Чегетни устасыны ишинде юрист билим керекди, ол тюрлю-тюрлю къагъытланы джарашдырады (чегетде джорукъну бузгъанлагъа актла джазады), ырджы айырыу бла байламлы чыкъгъан даулагъа къошулады. Сёз ючюн, юйчюкле ишлейбиз деб, джерлени ортакъгъа алыб, джылла бла алада джукъ этмей тургъанлагъа да законну тамалында мадарла этиледиле. Ол заманда чегетни устасы акт джазыб, Табигъат байлыкъла бла экология министерствогъа джибереди.
Ермоловкада чегетчиликни Даусуздан Архыз чегетчиликде Рапочай суучукъну къатына дери 13 минг гектар джери барды. Айтыргъа, бу суучукъгъа джол нарат чегетни ичи бла барады, туристлени арасында бу джол белгили болуб бошагъанды. Зеленчук районну чегет мюлкюне бюгюнлюкде Къочхарланы Ахмат башчылыкъ этеди. Аны къурамына беш чегетчилик киреди. Анда баш эмда орта дараджалы 46 алты уста – чегет мюлкню инженерлери, чегетлени сакълагъанла, чегетчиле дагъыда башхала – ишлейдиле.
«Евгений берилген ишни заманында эмда деменгили толтургъан устады. Ол кесини чегетчилигине джууаблы кёзден къарайды, чегет ишге, табигъатны сакълаугъа джюреги бла берилибди», – дейди Къочхарланы Ахмат.
Евгений Ягодка Даусуз элде урунууну сюйген, огъурлу юйдегиде ёсгенди. Атасы Анатолий, автобус джюрютюб, САО-ну къуллукъчуларын астрофизиклени эллери Буковогъа (Тёбен Архыз) ташыб тургъанды. Анасы Любовь юй джумушха къарагъанды, юч сабийни ёсдюргенди.
Евгений Даусузда экинчи классны бошагъанындан сора Тёбен Архызда школгъа кёчгенди. 90-чы джылланы ахыр сюреминде Тёбен Архызны школу эм игилени бирине саналгъанды, бассейн, теннис корт, тюрлю-тюрлю кружокла болгъандыла.
Женя айырмагъа окъумаса да, юрист болургъа мурат этгенди. Муратына джетер ючюн, ол биринчи Армавирде финанс-экономика техникумну Зеленчук станседе филиалына кириб, юриспруденция джаны бла усталыкъ алгъанды. Аны тауусханындан сора Иваново шахаргъа кетиб, Халкъла арасы управление институтну юристле хазырлагъан бёлюмюне киргенди. Аны бла бирге къаты затланы умур этген (шаровая мельница) заводда машинист болуб ишлеб тургъанды. Ызы бла къадар аны Новороссийск шахаргъа келтиргенди. Ол анда темир джол вагонлагъа ремонт этген слесарь усталыкъны алгъанды. Аны бла да къалмай, юйюне келген кёзюуюнде, Уруп ГОК-ну тамалында къуралгъан окъуу комбинатда механик усталыкъ алыб чыкъгъанды.
Евгений Ермоловка чегетчиликни устасы къуллукъда ишлегенли беш джылдан аслам болады. Чегетчи Владимир Дьяченко бла аны болушчусу Николай Мельниковну ол кесини устазларына санайды.
– Сёз джокъду, бизни табигъат бир да байдыла, ала талала, эмен эмда нызы чегетле бла бир-бирлерин ауушдурадыла. Бюгюнлюкде къайын тереклени башлары саргъала турадыла. Биринчи къырау ургъанлай ала эрлай сары болуб къаллыкъдыла. Хар терек – чынар, эмен, кюрюч, граб, бусакъ – къач кёзюуде кесини энчи бояуун саугъа этеди. Джууала джыйгъан кёзюу да башланнганды, – дейди Евгений.
– Ол ариулукъ, артыкъсыз да джууала джыйгъан кёзюуде, туристлени кесине тартады. Ала уа ызларындан багуш къалаула къоядыла. Чегетни багушдан тазалар ючюн, къуру волонтёрла къарыу эталлыкъ тюлдюле, – деб мен да сёзге къошулама.
– Мен а болум алай аманды деб айталлыкъ тюлме. Биз хар нени да эсебде тутабыз. Палатка лагерлеге уллу эс бёлебиз. Андан сора да чегетге от тюшмезча къоркъуусузлукъну баджарабыз. От тюшерге боллукъ къуу тереклени, бутакъланы, башха материалланы джыйгъанлай турабыз, – дейди Евгений.
Айтыргъа, Евгений Ягодка иш нёгерлери бла бирге Тёбен Ермоловка элни къатында тау тикде, Теберди ёзенде, Медногорский посёлокну къатында чёгетлеге от тюшгенни джукълатыугъа къошулгъанды. Чегетледе от тюшюуге къаршчы кюреш бардыргъан устала къарыуларын-кючлерин аямай кюрешгендиле.
Чегетчини ишине тынчды деяллыкъ тюлсе, джай иссиде, къыш сууукъда ала табигъатны сакълау бла байламлы ишлерин тохтаусуз этгенлей турадыла. Этген ишинг кёлюнге джетсе, аны бла бирге юйюнгде джасалгъан тепси, юй бийченги джарыкъ ышаргъаны, сабийлеринг сакъласала, ол тюлмюдю керти насыб?! Чегетни устасы Евгений Ягодканы ашхы юйдегиси барды. Ол бийчеси Юлия бла эки джашны – Данил бла Володяны – ёсдюредиле. Аланы бачхалары барды, терекле да ёсдюредиле. Аладан иги битим да аладыла.

ОСАДЧАЯ Людмила.
«День республики» газет.