Баргъан джолунда илмуну джулдузун джандырыб, аны джарыгъын халкъына джайгъан, адебли, намыслы, уллу адамлыгъы болгъан ашхы уланланы бириди Хапчаланы Абукну джашы Исмаил. Ол, туугъан халкъын, джуртун багъалата, сыйын, махтауун мийкге чыгъара джашайды. Анга бу кюнледе 85 джыл толады.

Ол 1940-чы джыл абыстол (ноябрь) айны 4-де Эски Джёгетейде Абукну халкъны ашхы адетлерин тутуб джашагъан огъурлу юйдегисинде туугъанды. Орта билим берген школну бошагъандан сора, Москвада М.В.Ломоносов атлы кърал университетге тюшюб, 1968-чи джыл аны философия факультетин тауусханды. 1971-чи джыл ол университетни аспирантурасына тюшюб, 1974-чю джыл аны философия факультетин джетишимли бошаб, «Психофизиологическая проблема в свете достижений современной науки» деген темагъа диссертациясын джакълайды. Алай бла, 1975-чи джыл анга философия илмуланы кандидаты болады.
1974-чю – 1977-чи джыллада, кърал ийиб, Астрахандагъы устазла хазырлагъан институтну философия кафедрасыны тамада устазы болуб ишлейди.
Ол, кесин илму ишге толу бериб, кече-кюн демей кюрешеди. Аны талай илму иши басмаланады. Таулу джаш, билимин андан ары ёсдюре, 1993-чю джыл докторантурагъа тюшюб, «Принцип детерминизма и психофизиологическая проблема» деген темагъа доктор диссертациясын джакълайды. Алай бла, анга 1994-чю джыл «философия илмуланы доктору» деген илму дараджагъа чыгъады. Фахмулу, билимли алим, кесини усталыгъы бла ишлей, бу джанына джангы затла киргизе, атын сый бла айтдырады. Ол джылдан Ставрополдагъы къурулуш институтну Пятигорскеде филиалында Социал-гуманитар илмуланы кафедрасында профессор къуллукъну толтурады, доцентди.
Андан сора Исмаил Саратовдагъы кърал юристлик академияны Шимал Кавказ юристлик институтунда филиалында кафедраны тамадасы болуб ишлеб турады.
Ол баш аттестацион комиссияны – кърал органны (ВАК) – профессоруду эмда философияны профессоруду. Аны бу эки сыйлы къуллугъу атын махтау бла айтдыргъан энчи мийик джетишимиди. Исмаилны 1995-чи джыл Шимал – Кавказ кърал техника университетде диссертация советни къурамына аладыла. Ол, алайда заманны излемине келишген джангы мадарланы, амалланы хайырландыра, окъуугъа, илмугъа, хайыр келтирген талай энчи зат киргизеди. Анга «философ» деб, баш усталыкъ аталады.
Москвада М.В.Ломоносов атлы кърал университетде философия бла обществознаниеден дерсле бериб тургъанды. Аны башчылыгъы бла 70-ден аслам джаш алим философия илмуладан кандидат эмда доктор диссертацияларын джакълагъандыла.
Аны 1996-чы джыл Социал илмуланы эресейчи академиясыны (РАСН) къурамына сайлагъандыла, аны академиги да болады. Хапча улугъа 2010-чу джыл «Почётный работник высшей школы» деген сыйлы ат аталгъанды.
Исмаил «Философия», «Юридическая психология», «Психология и педагогика» деген усталыкъладан дерсле бериб турады. Ол 50 джылдан аслам заманны усталыгъына кертилигин танытыб ишлейди. Хапча улуну 137 илму иши басмаланнганды. Аланы арасында Эресей Федерацияны Окъуу министерствосуну грифи бла баш окъуу заведениелени студентлерине джораланнган философиядан юч окъуу пособие, «История и философия науки» деген усталыкъдан алты окъуу пособие бардыла. Исмаилны илму ишлери Москваны кърал университетинде, ара басма издательстволада басмаланнганлай тургъандыла. Аны илму излемини тамалы джамагъатны акъыл, тин байлыгъын ёсдюрюудю, аны психология, физиология джаны бла орун алгъан джарсыуларыны оноуларын эте, организм къалай ишлегенине къарауду. Уллу алим бу джаны бла ашхы джетишимлеге ие болгъанды.
Нёгерлери, тенглери, аны билгенле айтхандан, Исмаилны адеби, намысы, ишленмеклиги мийикди. Джарыкъ фахмусу, уллу билими, тин, иннет байлыгъы болгъан джердешибиз адамлагъа халал къуллукъ этеди. Ол, чомартлыкъны, халаллыкъны, шохлукъну кючюн бегите, ариу сёзюн айта джашайды.
Биз, Исмаилны 85 толгъан юбилейи бла алгъышлай, анга мындан ары да къууанч, насыб, кючлю саулукъ, узакъ ёмюр теджейбиз.

Лепшокъланы Хусеин.