Аууз-герги (октябрь) айны 28-де Шимал Кавказ кърал академияда, Халкъ бирликни кюнюне аталыб, «Главное вместе» деген ат бла фестиваль бардырылгъанды.

Аны КъЧР-ни Миллет ишлерини, кёбчюлюк коммуникациялары бла басмасыны хакъындан министерствосу бла «Смысловой центр» АНО къурагъандыла. Фестивалгъа къошулгъанланы арасында илмуланы докторлары, кандидатлары, устазла, студентле, учреждениелени, ведомстволаны, тюрлю-тюрлю органланы, джамагъат бирлешликлени келечилери, атала бла анала дагъыда башхала болгъандыла.
Аны ишине республиканы 8 баш окъуу заведениеси бла колледжини студентлери къошулгъандыла. Командала кеслерини чыгъармачылыкъ проектлеринде ана тилде фольклорну, джырны, назмуну, халкъ инструментлени, кийимлени, декоратив-прикладной искусствону эмда башха затны юсю бла, Къарачай-Черкесияда джашагъан халкъланы багъалы затларын кёргюзгендиле.
«Разные народы – общероссийские ценности» деген тема фестивалны тамалы болгъанды. Джашла бла къызла, чыгъармачылыкъ фахмуларын, билимлерин ача, тириликлерин кёргюзюб, сейир ишле къураб, джыйылгъанланы сейирсиндиргендиле.
Ызы бла алимле, джазыучула, устазла дагъыда башхала ёсюб келген джаш тёлю фахмулу, билимли, къайгъырыулу болгъанын, шохлукъгъа, игиликге, ашхылыкъгъа, патриотлукъгъа тырмашханын айтыб, алагъа сый бериб сёлешгендиле.
Проектни тамадасы Къарабашланы Нелля айтхандан, фестиваль джаш адамла регионну халкъларыны адетлерин кёргюзюрча, аланы терен магъаналары болгъанын сездирирча площадка болгъанды. Мындан ары да джашла бла къызла былайда тюрлю-тюрлю ашхы ишлени юслери бла тюбешиб, маданиятны, адабиятны, тарихни, шохлукъну хакъындан этген оюмларын айтырча, фахму, билим кючлерин ачыкъларча мадар табарыкъдыла.
Бу ашхы иш да тюрлю-тюрлю миллетлени джаш адамларын бирикдирирге, алагъа эресейчи халкъланы биригиулерини терен магъанасы болгъанын сездирирге джораланнган эди.

Узеирланы Хусей.