Биринчи тюбешиую вице-премьер Александр Хлопонин бла болгъанды. Къарачай-Черкесияны социал-экономика ёсюмюню былтыргъы эсеблерин сюзген сагъатда республикада федерал нюзюрлю программала бла (сёз ючюн, «ШКФО-ну 2025-чи джылгъа дери социал-экономика ёсюмю» дегенчала бла) байламлы ишлеге айырыб эс бёлгендиле. 2017-чи джылны ичинде Къарачай-Черкесияда ол джаны бла, иги динамика эсленнгенин айта, ол затха федерал министерствола бла, бирси санагъатла бла да байламлылыкъ бегий баргъаны себеблик этгенин чертгендиле. Республика бу джылгъа белгилеген джангы проектледен сора да промышленностда, эл мюлкде, туризмде алгъаракъ башланнган инвестицион проектлени юслеринден да баргъанды сёз.
Урунуу бла социал джакълыкъны федерал министри Максим Топилин бла да талай магъаналы ишни сюзгендиле. Биринчи сабий туугъан юйдегилеге ай сайын бериллик ачха да аланы бириди. Бу затда башламчылыкъ этген Президент Владимир Путинди.
Аны кибик Президентни майда чыкъгъан указларын сагъына, бизни республика аланы джашауда тыйыншлысыча бардыргъан регионланы тизиминде болгъанын чертгендиле эки джаны да. КъЧР-ни Башчысы министрге бюджетниклени иш хакъларын ёсдюрюуге джораланыб республикан бюджетге миллиард джарым сом салыннганын да билдиргенди.
Минтрудха къарагъан республикан учреждениелени (медицина-социал экспертизаны КъЧР-де баш бюросу, Пенсион фондну социал страхованиени джамагъатны иш бла баджаргъан къуллугъуну регионал бёлюмлери дегенчаланы) былтыргъы эсеблерине да къарагъандыла, алдагъы борчланы да белгилегендиле.
«РусГидрону» Башчысы Николай Шульгин бла тюбешиуню баш темасы уа Къарачай-Черкесияда гидроэнергетиканы айнытыу болгъанды. Рысхыгъа, джерлеге оноу этген министр Евгений Поляков да къошулгъанды ол ушакъгъа. Быйыл ол джаны бла республикада талай иш этилирге керекди, деб келишгендиле эки джаны да. Сёз ючюн, Уллу Зеленчук сууда ишленнген гитче гидроэлектростанция хайырланыугъа берилликди, энтда аллай эки объектни къурулушу башланныкъды.
Гидроэнергетиканы айныуу Къарачай-Черкесиягъа социал джумушланы баджарыргъа да уллу себеблик болгъанын чертгенди тюбешиуде Рашид Бориспиевич.
