Бизни республикадагъы шекер заводда производствону модернизациясыны биринчи кёзюую тамамланды.

Аны кючю бла предприятиени продукта бёлюмюн джангыртхандыла, джангы гидротранспортёр, упаковкала этген линия къургъандыла, диффузион аппаратны тюрлендиргендиле, аны кибик башха затланы этгендиле. Къысхасы, заводну кючю эки къат ёсгенди. Сёз ючюн, 2016-чы джыл ол суткагъа 2200 тонна шекер чюгюндюрню джарашдырала эди, 2017-чи джылда уа ол санны 4000-нге джетдире кетген эди. Анга кёре продукциясыны асыулулугъу да иги болгъанды, газны юсю бла этилген джоюм да 25 процентге азайгъанды.
Заводда модернизация мындан ары да бардырыллыкъды. КъЧР-ни экономика ёсюмюню министри Накохов Али, джерге, мюлкге оноу этген санагъатны башчысы Евгений Поляков эмда предприятиени тамадасы Бердиланы Рамазан, мындан алда тюбешиб, ол иш бла байламлы борчланы сюзгендиле. Модернизацияны экинчи, ючюнчю кёзюулерине да план салыннганды. РФ-ны Шимал Кавказны ишлерини хакъындан министерствосу бла «Корпорация развития Северного Кавказа» АО-ну программаларына къошулур ючюн, заявкала берилиб турадыла.

Алгъы бурун андагъы ТЭЦ-ге этилликди модернизация, алай болса, электрокъууат юч къатха кёб боллукъду, газ да аз джоюллукъду, алай эсе, производство ёсерикди. Быйыл, сёз ючюн, энтда бир диффузион аппарат салынныкъды. Олсагъатда предприятие бир суткагъа 4-8 минг тонна чюгюндюрню джарашдырлыкъды.
Модернизацияны кючю бла 2020-чы джылгъа заводну кючю юч къатха ёсерге керекди, башхача айтсакъ, суткагъа 13 минг тонна чакълы чюгюндюрню джарашдырыргъа мадары боллукъду.
Аны бла бирге шекер завод социал джюкню да бойнуна алгъанын унутмазгъа керекди. Эркин-Шахарны бюгюнлюкде суу бла баджаргъан эмда окъуу учреждениелеге болушлукъ этген да олду.