Аууз-герги (октябрь) айны 28-де Къарачай-Черкесияны Прокуратурасында «тёгерек стол» бардырылды. Анда 2025-чи джылны 9 айында коррупциягъа къаршчы кюреш къалай баргъаны сюзюлдю.
Джыйылыугъа КъЧР-ни Башчысыны коррупциягъа къаршчы ишлеге къарагъан управлениесини къуллукъчусу Кёбекланы Альберт, Халкъ фронтну регионал бёлюмюню келечиси Асият Макарова, КъЧР-ни Джамагъат палатасыны къурамына кирген Рашид Канцеров, республикан СМИ-лени журналистлери къошулгъандыла.
Республиканы прокуроруну коррупциягъа къаршчы законла къалай толгъанларына къарауну хакъындан тамада болушчусу Боташланы Радмир 2025-чи джылны 9 айында баджарылгъан ишле бла джыйылгъанланы шагъырей этди.
– Джорукъ бузулгъаны бла байламлы 509 эсгертиу (представление) чыгъарылгъанды. Аланы юслери бла 500 къуллукъчу джууабха тартылгъанды. Законнга келишмеген норматив-право къагъытлагъа 532 къаршчылыкъ (протест) чыгъарылгъанды, алагъа тыйыншлысыча къаралгъанды. Прокурорланы бегимлери бла 50 къуллукъчу, коррупциягъа къаршчы законну бузгъаны ючюн, административ халда джууабха тартылгъанды. Къралгъа 70 мелиуан сомдан аслам ачханы ызына къайтарыу бла байламлы 29 иск сюдге джиберилгенди. Прокурор тинтиулени эсеблерине кёре джорукъ сакълагъан органла 10 терслеу иш ачхандыла, – деди Боташланы Радмир.
Ол айтханнга кёре, аманлыкъ ишлени кёбюсю кърал эмда муниципал джумушланы баджарыу, контроль этиу аны кибик бюджет санагъатла бла байламлыдыла.
– Прокурорланы кючлери бла 927 право актда коррупциягъа джол ачхан кемликле тюзетилгендиле. Тюшюрген хайырларыны, рысхыларыны юсюнден тюз хапар бермегенлери ючюн, 5 кърал къуллукъчу ишден къысталгъанды, 4 джергили депутат да ишин болджалдан алгъа тамамлагъанды. Бютеулей да быйылны 9 айыны ичинде коррупцияны юсю бла 114 аманлыкъ иш ачыкъланнганды, аланы 49-у улхучулукъ бла байламлы болгъанды. Республиканы сюдлери 24 адамгъа ачылгъан 21 терслеу ишге къарагъандыла, – деб да къошханды прокурорну тамада болушчусу.
«Тёгерек столгъа» къошулгъанла коррупциягъа къаршчы кюрешни юсюнден оюмларын айтдыла, ол ишни республиканы прокуратурасы деменги-
ли бардыргъанын чертдиле.
Джыйылыуну ахырында прокуратураны къуллукъчусу соруулагъа джууаб берди.
САЛПАГЪАРЛАНЫ Умар.
