Черкесскеде фахмулу сабийлени ачыкъларгъа эмда ёсдюрюрге багъышланнган «Спутник» аралыкъда «Возвращение теосеракта» деб интерактив квест-шоу бардырылгъанды. Ол бюгюннгю технологияладан хапарлы сабийлени, джаш адамланы бирикдиргенди.

Анга къошулгъанла джалгъан ангыны (искусственный интеллектни), программированиени, робототехниканы эмда пилотсуз системаланы дуниясына батылгъандыла.
Къонакъла дронланы пилотлары, инженерле болуб ойнагъандыла, команда эришиулеге къошулгъандыла, «Илму къатыбыздады» деген кёрмючге баргъандыла. Алай бла, оюннга къошулгъанла технологияла бюгюннгю джашауну къалай тюрлендиргенлеринден хапар билгендиле.
Квест-шоуну къурагъан эмда бардыргъан Андрей Дорогавцев айтханнга кёре, проектни баш магъанасы джаш тёлюню заманны излемине джууаб этген технологияла бла танышдырыу, аланы бюгюн джашауда бек керекли болгъанларын сездириу болгъанды.
– Джаш адамла билимли болгъанларын танытыргъа керекдиле. Былайда тюрлю-тюрлю квестле, квизле, кёрмючле бардырыллыкъдыла. Бюгюнлюкде сан (цивровая) технология бла байламлы джангылыкъланы барысы бла да келгенлени шагъырей этиу баш джумушубузду, – деб чертгенди ол.
Айтыргъа, келир заманда бизни джашауубузда кеслерине орун айырлыкъ технологиялагъа къолунг бла узалыб джетерчады. Аны толу ангылагъан джаш адамла илму бла инвестицияланы джолуна таукел турлукъдула.