«Иги экология болум» деген джангы миллет проектни тамалында КъЧР-де «Чегетни сакълайыкъ» деб уллу акция бардырылгъанды. Аны юсюнден КъЧР-ни Башчысы Темрезланы Рашид кесини МАХ каналында джазгъанды.

200-ден артыкъ адам – аланы ичлеринде республиканы Табигъат байлыкъла бла экология министерствосуну къуллукъчулары, Уруп чегет мюлкню келечилери эмда чегетни отдан къоруулаучула, «Экосистема» РО-ну эковолонтёрлары, регионну тири къымылдагъан джаш тёлюсю, чегетчилик иш бла кюрешген сохтала да болгъандыла – Преградна стансени къатында джыйылгъанды. Ала 200 терек орнатыр нюзюрню тутхандыла.
– Быллай мамматлыкъла республиканы башха районларында да боллукъдула. Бу ишге толтуруучу власть органланы адамлары, сохтала, студентле, чегетчиле, волонтёрла, джамагъат бирлешликлени келечилери къатышырыкъдыла.
Бютеулей да акциягъа регионда 1000-ден аслам адам къошуллукъду. Айны аягъына 1000-нге джууукъ терек салынныкъды. Ол белгиленнген пландан 2300 терекге кёбдю. Къарачай-Черкесияны табигъатын, чегетлерин сакълаугъа юлюш къошхан адамланы барысына да джюрек разылыгъымы билдиреме, – деб чертгенди КъЧР-ни Башчысы Темрезланы Рашид.