Къарачай-Черкесияда магъаналы объектледе хар неге къараб бошагъанындан сора РФ-ны Вице-премьери Марат Хуснуллин: «Регион уллу ёсюм алады, миллет проектле джетишимли толтуруладыла, хар иш да заманында этилиб баргъаны кёрюнеди», – дегенди.

РФ-ны Вице-премьери мында республиканы Башчысы бла бирге Къарачай-Черкесияны социал-экономика ёсюмюне аталгъан кенгеш да бардыргъанды.
Кенгешде «Инфраструктура для жизни» деген миллет проектни тамалында бизни республикада этилген ишле сюзюлгендиле.
Марат Шакирзянович Хуснуллин, РФ-ны Президенти Владимир Путин адамланы джашауларын игилендириу бла байламлы салгъан борчну джетишимли толтурур ючюн, къурулуш, улоу эмда джол инфраструктура, шахарда таб болум къурау дегенча ишлеге айырыб эс бёлгенди.
Темрезланы Рашид къурулуш санагъатха ёсюм алдырыугъа, коммунал комплексни джангыртыугъа, улоу инфраструктура бла кёбчюлюк хайырланыучу джерлени джарашдырыугъа аталгъан ишле келишиулю этилгенлери себеб бола башлагъанын чертгенди.
Кенгешни кёзюуюнде КъЧР-ни Правительствосуну Председатели Мурат Аргунов ол джумушла къалай этилгенлерини юсюнден толу хапар айтханды.
Темрезланы Рашид да: «Бюгюннгю кенгеш этилген ишлени эсеблерин чыгъарыб, мындан ары этилликни белгилерге, регион бла федерал аралыкъны планларын келишдирирге джарады. Бу тюбешиу РФ-ны Президенти Владимир Путин салгъан борчланы мийик дараджада толтурургъа, алай бла, адамланы джашауларын игилендириуге джол ачарыгъы хакъды», – дегенди.
Федерал аралыкъдан келген къонакъны КъЧР-ни Башчысы Темрезланы Рашид бла Черкесск шахарны мэри Алексей Баскаев «Джашил айрымкан» паркда айландыргъандыла. Алайда Гитче кёлню джагъасы «Малые города и исторические поселения» деб, саулай Эресейде бардырылгъан конкурсда хорламлы болгъаныбызны себебинден таб джарашдырылгъаныны хапарын да айтхандыла.
Темрезланы Рашид суу джагъа айбат этилгенин, солурча джерле джарашдырылгъанларын, гокка хансла, кёкенле орнатылгъанларын, сабий площадкала ишленнгенлерин чертгенди.
Келир джыл да ол конкурсха «Благоустройство набережной реки Кубань» деген проектни теджерге, аны тамалында «Джашил айрымканны» кюнбатыш джанын да таб джарашдырыргъа мурат этгенин айтханды.
Марат Хуснуллин да, паркда болумну джаратханын чертиб, бюсюреу этгенди. Аны кенгертиу бла байламлы планны да ушатханды.
РФ-ны Вице-премьери Марат Хуснуллин «Джашил айрымкан» паркда Гитче кёлню джагъасына шахарчыла сюйюб джайылгъанларын чертгенди.
Федерал аралыкъдан келген къонакъны ашыра башлагъанында Темрезланы Рашид: «Марат Шакирзянович Къарачай-Черкесияны социал-экономика ёсюмюне былай къайгъыргъаныгъыз, къралны Правительствосуну атындан сёзюгюз, ишигиз бла да кёлтюргючлюк этгенигиз ючюн, разылыгъымы билдиреме», – дегенди.