Аууз-герги (октябрь) айны 9-да Къарачай-Черкесияны Джамагъат палатасында рахатлыкъны сакълаугъа аталгъан джыйылыу болду.
Анга Къарачай-Черкесияны Халкъ Джыйылыууну (Парламентини) депутатлары, Прокуратураны, Дин эмда миллет бирлешликлени келечилери, КъЧР-ни миллет ишлерини, кёбчюлюк коммуникациялары бла басмасыны хакъындан министерствосу бла республиканы Ич ишлерини хакъындан министерствосуну Экстремизмге къаршчы кюрешни бардыргъан аралыгъыны къуллукъчулары дагъыда башхала къошулгъан эдиле.
«Биз, бир юйюрча, терроризмге, экстремизмге, аны кибик башха аманлыкълагъа къаршчы кюрешни бардырабыз. Бизни къралыбызны, республикабызны халкъларыны арасында джаулукъ джюрютген джокъду, миллетчилик да тамыр иймегенди.
СВО-да бизни келир заманыбызны джакълай тургъан джигитле да терроризмге, экстремизмге къаршчы кюрешге юлюш къоша тургъанларын барыбыз да ангылайбыз», – дегенди КъЧР-ни Джамагъат палатасыны тамадасы Елена Ляшова.
Башхала да аны айтханына къошула, артыкълыкъгъа, экстремизмге къаршчы хайырландырылгъан мадарланы сагъындыла. Джыйылыугъа къошулгъанла, терроризмге, экстремизмге къаршчы кюрешге «кишен» болгъан кемликлени сюзюб, аланы тюзетир амалла да айтдыла.
Алайда джаш адамланы бир-бирлерин ангыларгъа, сыйларгъа юретген билим бериу программала къураргъа керекди, дегенле да болдула. Ала сабийлеге гитчеликден огъуна сабыр, тёзюмлю, келишиулю болургъа, башхалагъа сый бере билирге юретирге кереклисин чертдиле.
Джыйылыугъа къошулгъанла артыкълыкъ бла экстремизмге къаршчы къаллай профилактика ишле бардыргъанларыны юсюнден айтыб, сынамлары бла алмашдыла.
Бир къауумла ышанмакълыкъны ёсдюрюуге, динле, миллетле арасы келишиулюкню бегитиуге себеблик этген ишлери бла башхаланы шагъырей этдиле.
Джыйылгъанла бары да экстремизм, терроризм дегенча аманлыкълагъа къаршчы кюрешде барыбыз да бириксек иги боллугъун чертдиле.
Ич ишлени хакъындан министерствону Экстремизмге къаршчы кюрешни бардыргъан аралыгъыны тамадасы Рамазан Рамазанов да экстремизмни идеологиясын джайгъанланы тыяр джанындан къаллай ишле бардырылгъанларыны юсюнден доклад этгенди. Ол айтхандан, бизни регионда джашагъан 164 адамгъа, Интернетде керексиз затланы джайыб, аманлыкъ ишлеге джол ачханлары ючюн, тохта-тын деб айтылгъанды.
Аны тыншында ЦПЭ-ни къуллукъчулары 1579 публикацияны джайгъанланы джууаблылыкъгъа тартхандыла. Аладан 1177-си, экстремизмни идеологиясын джайгъаннга саналыб, РФ-ны Юстиция министерствосунда экстремист материалланы федерал тизимине киргизилгенди, 197-де СВО бла байламлы РФ-ны Сауутлу кючлерини сыйларын тюшюрген хапарладыла. Къалгъан 205-си да Эресейни власть органларыны ишлерини юсюнден ётюрюк информацияла болгъандыла.
Джамагъат палатаны джыйылыууна къошулгъанла джаш адамланы джамагъат ишлеге къошууну юсюнден да оноулашхандыла. Спорт, джарыкълыкъ ишле ёсюб келген тёлюню заманын бош ашырмазгъа джарарыкъларын чертгендиле.
Джыйылыуну ахырында ала бары да, сагъынылгъан ишлени джетишимли баджарыб, бютеу джамагъат рахат джашарына ышаннганларын айтхандыла. Алай болур ючюн, аланы хар бири да къолундан келгенни этерге джюкленнгенди.
БАЙРАМКЪУЛЛАНЫ Зульфия.
