Лепшокъланы Алибекни джетишим джулдузу, мийикден джылтырай, халкъны тохтаусуз джарытады. Аны сезим хазнасы адамланы, тауланы ийнакълай, кертиликни, тюзлюкню кючюн тёгерекге джая джашайды.
«Эресей Федерацияны эркин тутушдан спортуну устасы», «Эресей Федерацияны белибаула бла тутушдан спортуну устасы», «Белибаула бла тутушдан Къралла арасы класслы спортну устасы» деген сыйлы атланы джюрютеди ол.
Алибек 1988-чи джыл Чапаевское элде Лепшокъланы Валераны халкъыбызны ашхы адетлерин джашаууну тёрю этиб джашагъан юйюрюнде туугъанды. Былайда 2005-чи джыл орта билим берген школну джетишимли бошагъанды. Школ джылларындан спортзалгъа джюрюб, кесин гитчеликден чыныкъдыргъанды. Ол заманда огъуна, тюрлю-тюрлю дараджада бардырылгъан спорт эришиуледе хорлаб, атын махтау бла айтдыргъанды. Ол, Къарачай-Черкес кърал академияны «Бизнес и право» факультетин тауусханды. Анда окъугъан сагъатында да баш окъуу заведениелени араларында эмда башха дараджалада бардырылгъан спорт эришиулеге къошулуб, эркин тутушдан ёчлю орунланы алыб тургъанды. Таукел, тири джаш, кече-кюн демей, кесин спортха бериб кюрешгенди.
Алай бла Лепшокъ улу 19 джылында «Эресей Федерацияны эркин тутушдан спортуну устасы», 21 джылында Эресей Федерацияны белибаула бла тутушдан спортуну устасы» деген сыйлы атлагъа ие болады. Ол 2013-чю джыл Къарачай-Черкес кърал университетге кириб, аны спорт факультетинде окъугъанды.
Алибек ол джыл, Казань шахарда бардырылгъан Бютеудуния джай универсиаданы эркин тутушдан спорт эришиулерине къошулуб, биринчи орунну иелеб, дунияны чемпиону болады. Аны эмда универсиада да хорлагъан башха джаш чемпионланы сыйлаб, къралыбызны Президенти Владимир Путин, кесине чакъырыб, Хурмет грамотала бергенди.
Ызы бла, 2013-чю джыл, белибаула бла тутушдан Владикавказда бардырылгъан Эресейни биринчилиги ючюн эришиуледе да хорлагъанды Алибек. Ол джетишими ючюн, анга «Къралла арасы класслы спортну устасы» («Мастер спорта международного класса по борьбе на поясах») деген сыйлы ат атагъандыла. Ол кесини, тукъумуну, халкъыны, къралыны атларын сый бла, махтау бла айтдыргъанды. уллу спортну алчы гёджебини джашау джолу кёблеге юлгюдю.
Алибек бюгюнлюкде Къобан муниципал районну Окъуу бла джаш тёлю политикадан эмда спортдан управлениесини бёлюмюню тамадасы къуллукъну толтурады. Ол юретиучю ишин да сый бла бардырады. Уллу фахмусуну, билимини, сынамыны кючюн джаш тёлюге береди. Районда спорт школла тыйыншлы дараджада ишлейдиле. Алагъа джюрюген джаш адамла тюрлю-тюрлю дараджада бардырылгъан спорт эришиуледе алчы, ёчлю орунланы алгъанлай турадыла. Районну спортчуларыны арасында кърал дараджада эришиулеге къошулуб, хорламлы болгъанла, ёчлю орунланы алгъанла да бардыла.
Лепшокъланы Алибек, джаш адам болса да, сабыр ауазлыды, джумушакъ сёзлюдю. Ол, хурметли миллетини сыйын мийик кёлтюре, анга халал къуллукъ эте джашайды.
Узеирланы Хусей.
