Быйыл къыркъаууз (сентябрь) айны 26-дан «Ата-бабаларыбызны адетлерин сакълай» («Храня традиции предков») аты бла бютеу Эресейде акция башланды. Ол «Школ сохталагъа теджелген маданият» («Культура для школьников») деген проектни эмда Эресейни ёмюрледен бери джашагъан аз санлы миллетлерини саулай къралда бардырылгъан маданият форумуну тамалында къуралгъанды.
Проект Эресейни Маданият эмда Билим бериу министерстволарыны къурамчылыгъы бла, Роскультпроектни, Эресейни маданият фондуну да болушлукълары бла бардырылады.
Акциягъа къошулгъан сохтала эртделеде къуралгъан, алай а бюгюнлюкде адам саны бла аз болгъан гитче миллетлени юслеринден хапар айтырыкъдыла. Ол конкурс халда юч тюрлю номинацияда бардырыллыкъды:
«Живое наследие» – эртдеден тургъан тарихли миллетни бюгюнлюкде сакъланнган адетлерини юслеринден;
«Наследники мудрости» – эртдеден тургъан тарихли миллетни башхалагъа ушамагъан энчиликлерини, айырылыб танытхан шартларыны, маданиятларыны юслеринден;
«Шаги навстречу культуре» – гитче миллетлени хар бирини къралыбызны маданият айныуунда орну эмда аны сакълауда сохталаны оюмлары.
– Бюгюнлюкде, ёмюрде болмагъанча, эртделеде къуралгъан гитче миллетлени тин-дин байлыкъларын айнытыу, аланы кенг джайыу, маданиятларын ёсдюрюу неден да алгъа баш орунну алгъанды къралыбызда. Анга арт джыллада артыкъ эс бёлюнюб башланнганды. Ёсюб келген джаш тёлюню ата-бабалырыны маданиятлары бла шагъырей этиу ишибизни баш муратыды. Конкурсха къошулгъан сохтала эртдеден бери джашагъан башында сагъынылгъан гитче миллетлени адетлери бла тарихлерин окъуб, соруб, тинтиб, аланы юслеринден кеслерини хазырлагъан ишлерин теджерикдиле, – дегенди Эресейни культура министрини орунбасары Жанна Алексеева.
Конкурсну эсеблерине кёре, эм игиге саналгъан 100 иш сайланныкъды. Конкурсда хорлагъан сохталаны ишлери абыстол (ноябрь) айда «Культурадляшкольников.РФ» деген порталда басмаланныкъдыла.
Дагъыда уллу къауумну арасында да форум баямланнганды. Бютеу Эресейде маданият форум, биринчи кере болуб, быйыл къыркъаууз – абыстол (сентябрь – октябрь) айлада къралыбызны тёрт шахарында бардырыллыкъды. Ол Эресейни санатда, маданиятда джетишимли болгъан, фахмулу, чемер усталаны бир джерге джыяргъа себеблик этерикди. Форум къыркъаууз (сентябрь) айны 26-да Чукот автоном округну Анадырь шахарында башланнганды. Аууз-герги (октябрь) айда Красноярск бла Петрозаводск, абыстол (ноябрь) айдаТюмень шахарлада бардырыллыкъды.
Бокайланы Фатима.
