Багъалы редакция! Адамны джюрегинде къууанчы, джарсыуу болса да, ол аны башхалагъа да билдирирге излейди. Джашау тюрлене бара, адамлыкъны шартлары сериуюн бола, хатерсизлик баш орун ала барады деб, бек къыйналгъанлай турама.
Мен, Алийланы Лариса, Къарачай шахарда Багъатырланы Харунну атын джюрютген 3-чю номерли школда къарачай тил бла адабиатдан устаз болуб ишлейме.
2024-чю джылны абыстол айында «Къарачай тил бла адабиатны эм иги устазы» деген эришиулеге къошулгъан эдим. Къарачай шахарда, республикан аралыкъда да баш саугъагъа ие болгъаным себебли, федерал дараджада бардырыллыкъ эришиулеге къошулургъа джол чыкъды.
Эресейни джер-джеринден менича хорламлы болгъан устазла, бютеулей да 120 адам, Бурятиягъа (Улан-Удэге) джолоучу болургъа керек болдукъ. Бу эришиуле башланнганлы кёб тюрлю адамла бла шагъырей болгъанма, уллу къуллукълары болгъанланы саны да асламды.
Аланы арасында айырыб экеуленни юсюнден хапар айтыргъа излейме. Бири, политика илмуланы кандидаты, «МонЭльбрус» деген театрны продюсери, «Созидание» деген фондну къуллукъчусу (волонтёру), ТурДом организацияны тамадасы, белгили тележурналист Къоркъмазланы Русланды. Экинчиси, мени сохтам, актёр, режиссёр, «МонЭльбрус» театрны тамадасы Мамчуланы Къарчады.
Эки джаш адам да, мени джолоучу боллугъуму билгенлеринде, школгъа келиб, сабийлени суратха, видеогъа алыб, «Учат в школе», «Школубузда юретедиле, юретедиле», деген джыргъа фонограмма да джаздырыб, ариу видеоклип этиб, мени кесими «Методическая мастерская» деген ишлериме къошхан эдиле. Алай бла ала меннге бек уллу болушлукъ этгендиле.
Мени да, биргеме баргъан завучубузну да билетлерибиз болгъанлыкъгъа, экибиз да джюгюбюзге кесибиз хакъ тёлерге керек эдик. Руслан билетлени суратларын ийдириб, джюгюбюзге да, Бурятияда турлукъ къонакъ юйюбюзде эртден азыкълагъа да хакъ тёлемезча джарашдыргъан эди. Бир ийыкъны, биз андан къайтхынчы, сёлешгенлей, джазгъанлай, элибизден, джерибизден узакъ джерде джунчумазча кёл бергенлей, хаман тынчлыгъыбызны, эсенлигибизни соргъанлай тургъан эдиле. Сау болсунла, бюгюнлюкде да меннге болушур ючюн къалмайдыла. Джаш адамла болгъанлыкъгъа, миллетибизни сюйген, тилибизни сакълаугъа, айынытыугъа юлюш къошхан, адамланы джарсыуларына къайгъыргъан, джетген кюнде билек болуб, болушлукъ этген джашладыла Къоркъ-
мазланы Руслан да, Мамчуланы Къарча да, джаш болсала да башдыла, мен алагъа джюрек разылыгъымы билдирирге излейме. Аллах юйдегилеринден, тутхан ишлеринден да къууандырсын!!! Быллай адамларыбыз кёб болса, миллетибиз да, тилибиз да айнырыкъ эди!
Алийланы Лариса,
устаз.
