Эресейни Социал фондуну КъЧР-де бёлюмю джылы келген адамлагъа, артыкъсыз да алгъын Пенсион фондда эмда Социал страхованиени фондунда ишлеб кетгенлеге, иги эс бёлгенлей турады. Социал фондну Къарачай-Черкесияда бёлюмюню тамадасы Аслан Озов Джылы келгенлени къралла арасы кюнюнде Пенсион фондда ишлеб кетген ветеранланы джыйыб, тюбешиу бардыргъанды.

Ол ишин «Тёгерек стол» халда къурагъанды. Джыйылгъанла ушакъны кёзюуюнде, ишлеген заманларын эслерине тюшюре, сынамларындан хапар айтхандыла. Ишлеб тургъанла да бусагъат заманны цифра сервислерин, адамлагъа таблыкъла къурагъан джангы мадарланы къалай хайырландыргъанлары бла къонакъларын шагъырей этгендиле.
Эресейни Социал фондуну регионал бёлюмю джыллары келген адамлагъа иги болушлукъ табдырады. Сёз ючюн, 80 джыл толгъан пенсионерлени белгили этилген тёлеу ачхаларыны ёлчеми 100 процентге кёлтюрюллюкдю. 2025-чи джылда страховой пенсиягъа къошулгъан къартлыкъ ачханы ёлчеми 8907 сом бла 70 капекге джетеди. Пенсионерлеге 80 джыл толгъанлай, ол 17815, 40 сом болады. Социал фонд ол айдан башлаб къошакъ ачханы тёлеб тебрейди.
Аслан Озов айтхандан, 80 джыл толгъан адам къошакъ ачха ючюн Социал фондну бёлюмюне барыб айланыргъа керек тюлдю. Бёлюм аллай адамгъа аны кеси тёлеб башлайды.
«Сиз, башыгъызгъа чал ургъан сынамлы адамласыз. Керекли ишлени эте, бизни ашхы адетлерибизни тутуб джашайсыз. Келлик тёлюлеге ашхы юлгю кёргюзген огъурлу адамласыз. Бизни республикада джыллары келгенлеге хаман да сый бериледи. Сиз бизге, сабийлеригизге, туудукъларыгъызгъа керексиз. Фахмугъуз, билимигиз хаман да джараб турлукъ джарыкъ кючдю. Мен сизге кючлю саулукъ, рахатлыкъ, къууанч, насыб теджейме», – дегенди Аслан Озов.

Анна Шаганова,
Эресейни Социал Фондуну КъЧР-де бёлюмюню СМИ-ле бла ишлеген къауумуну тамадасы.