Къарачай-Черкес Республиканы Башчысы Темрезланы Рашид мындан алда Россияны Президенти Владимир Путин Кремлде бардыргъан Кърал Советни кенгешине къошулгъанды.
Анда къралны башчысы властны федерал эмда регионал органларыны тамадаларыны алларында регионлада инвестицион халны игилендириу джаны бла джангы борчла салгъанды. Бизнесни бардырыугъа, джангы производство ачыугъа тыйыншлы болум къурауну юсюнден бара эди сёз. Алай эсе, ол регионлада джангы иш орунла ачыллыкъдыла, социал джумушланы тындырыу иги дараджагъа кёчерикди, иш хакъны ёсдюрюрге мадар чыгъарыкъды, ол затла уа, Президент айтханлай, бюгюнлюкде айырылыб магъаналыдыла.
- Инвесторланы илешдириу, сёзсюз да, регионланы экономика ёсюмлерине эмда налогладан хайыр тюшюрюуге тамал болады. Барына да - территориал, регионал, муниципал къуралышлагъа - инвесторланы бери илешдириу бла байламлы бирча борчла салыныбдыла, - деб чертгенди Владимир Путин.
Президент айтыудан, анга кёре законодательстону да келишдирирге керек болады. Дагъыда кенгешде айтылыннган бир оюм: инвесторланы кесине илешдириуню баш фактору финанс джаны бла деменгилиликди.
2018-чи джылда В.Путинни башламчылыгъы бла бюджет кредитлеге реструктуризация этиуню джангы программасы ачыллыкъды. Ол хал регионланы бюджетлерини дефицитин азайтыргъа себеб боллугъун да чертгендиле джыйылыуда.
Кенгешде сёзге къошула, КъЧР-ни Башчысы Темрезланы Рашид да, башында сагъынылгъан магъаналы ишлени баджарыуну себеби федерал эмда регионал къуралышланы биргелей иш джюрютюулеринде болгъанын чертгенди. Инвесторла бла ишлеуню Къарачай-Черкесияда ашхы юлгюлери  уа бардыла: Архыз, Доммай курортланы айнытыу, селекцион урлукъ аралыкъ ачыу, «КавказЦементге» модернизация этиу, джюнню джарашдыргъан фабрика къурау эмда башхала.
Джыйылыуда башха оюмла бла бирге бизнесни бардырыуну процедурасын не къадар тынч этиуню юсюнден да баргъанды сёз.
 
ЁЗДЕНЛАНЫ Якъуб.
 
{jcomments}