Къыркъаууз (сентябрь) айны 11-де «Бирикген Эресей» партияны Джамагъат штабында «Диктант Победы» деген халкъла арасы тарих акциягъа къошулуб, бизни республикада иги кёргюзюмлеге джетгенлени саугъаладыла.
Белгилисича, быйыл Уллу Хорламны 80-джыллыгъына, Ата джуртну къоруулаучуну джылына аталыб, къралыбызда кёб иш баджарылгъанды. Уллу Ата джурт къазауатны тарихи бла байламлы сорууладан къуралгъан «Диктант Победы» акция да аланы бириди. Быйыл ол 7-чи кере бардырылгъанды. Бизни республикада быйыл диктант 85 площадкада джазылгъанды. Анга уллу-гитче да сюйюб къошулгъандыла. Быллай ишле къазауатны тарихи, Эресейни кёб миллетли халкъыны джигитлиги унутулмазча этерге болушадыла.
«Бирикген Эресей» партияны регионал исполкомуну тамадасы, КъЧР-ни Халкъ Джыйылыууну (Парламентини) депутаты Джаммаланы Руслан «Диктант Победы» акцияны магъанасын чертди, хорлагъанланы да алгъышлады.
– Джылдан джылгъа диктантха къошулгъналаны саны ёсюб барады. Быйыл анга 5 минг адам къошулгъан эди. Къарачай-Черкесия иги кёргюзюмлери бла атын айтдыргъанлай турады. Хорлагъанланы арасында сохтала, студентле болгъанларына бек къууаннганма. Диктантны бардырыргъа болушханлагъа да уллу бюсюреу этерге излейме. «Диктант Победы» дегенча акцияла тёлюлени бирикдиредиле, тарих унутулмазча этедиле. Ёсюб келген джаш тёлю Уллу Ата джурт къазауатны джылларында джердешлерибиз танытхан джигитликни унутмазгъа керекдиле, – деди Джаммаланы Руслан.
Ызы бла Джаммаланы Руслан, диктантха къошулуб, Къарачай-Черксияда алчы болгъанланы саугъалады. Аланы атларын да айтайыкъ: Черкесск шахарны 9-чу номерли гимназиясыны 11-чи классыны сохтасы Алийланы Медина, Къарачай-Черкес медицина колледжни студенти Лайпанланы Милана, Шимал Кавказ кърал академияны студенти Биджиланы Саида, КъЧР-ни Аскер комиссариатыны къуллукъчусу Анна Лищенко, Чапаевское элни орта школуну тарихден устазы Ораскъулланы Марина. Алагъа дипломла бла саугъала берилди.
Андан сора «Диктант Победы» акцияны бардырыугъа тири къошулгъан талай адамгъа «Бирикген Эресей» партияны ара толтуруучу комитетини тамадасы, «Наша Победа» деген къурау комитетни джууаблы секретары Александр Сидякинни, партияны регионал бёлюмюню секретары Александр Ивановну атларындан бюсюреу къагъытла берилдиле.
Хорламгъа тыйыншлы болгъанланы бири Черкесск шахарны 9-чу номерли гимназиясыны 11-чи классыны сохтасы Алийланы Медина бизни бла ушагъында бу акциягъа биринчи кере къошулгъанын айтды.
– «Диктант Победы» акциягъа сюйюб къошулгъан эдим. Анда берилген соруула алай тынч болмасала да, билимиме кёре джууаб берирге кюрешген эдим. Мен тарих бла обществознаниеден дерслени бек сюеме. Къралыбызны тарихинден иги хапарлы болургъа талпыйма. «Диктант Победы» дегенча акцияланы магъаналыгъа санайма. Келир джыл да анга къошулургъа муратлыма, – деди ол.
САЛПАГЪАРЛАНЫ Умар.
