Къыркъаууз (сентябрь) айны 11-де, 12-де Черкесскеде «Цифровая прокачка. Региональный день муниципалитетов» деген стратегия сессия ётгенди.
Анга Шимал Кавказ федерал округну субъектлеринден районланы, шахарланы башчылары, джергили власть органланы къуллукъчулары, министерствола бла ведомстволаны келечилери къошулгъандыла.
Стратегия сессияны КъЧР-ни Правительствосу бла кеси башларына оноулу джергили органланы айнытыуну бютеу Эресей ассоциациясы (ВАРМСУ) болушлукъ этиб, «Цифровая экономика» АНО къурагъанды.
Бу ишни баш мураты – регионланы арасында байламлылыкъны ёсдюрюу, кърал эмда джергили власть органланы цифрагъа кёчюрюу бла байламлы ишлени белгилеу.
Джыйылыугъа къошулгъанланы алларында КъЧР-ни Халкъ Джыйлыууну (Парламентини) Председатели Александр Ивановну атындан Парламентни Экономика политиканы, табышлылыкъ ишни, цифра ёсюм бла туризмни хакъындан комитетини председатели Алексей Ганшин сёлешгенди.
– Бюгюнлюкде биз цифра технологияла дженгил ёсюм алыб баргъан заманда джашайбыз. Законла чыгъарыучу органча бизни баш борчубуз джангы технология
ланы хайырландырырча болум къурауду. Бизни ишибиз да цифровизация бла къысха байламлыды. Регионал законланы заманны излемине келишдириуге да уллу эс бёлебиз. Цифра ишибизни файдалы, законланы да адамла ангыларча этеди. Закон чыгъарыу ишге цифра технологияланы сингдириу властны ишин ачыкъ, административ ауурлукъну да аз этеди, адамланы джашау дараджаларын игилендирирге мадар береди, – дегенди Алексей Ганшин.
КъЧР-ни цифра ёсюмюню министри Валерий Медовый да быллай сессияны магъанасын чертиб сёлешгенди. Ол айтхандан, цифра технологияла бла ким да эркин хайырланырча этерге тыйыншлыды.
Джыйылыуну кёзюуюнде Халкъ фронтну толтуруучу комитетини тамадасы Михаил Кузнецовну атындан Валерий Медовыйге, «Народный Фронт. Всё для Победы» деген сууаблыкъ фондну ишине болушханы ючюн, Бюсюреу къагъыт берилгенди.
ВАРМСУ-гъа башчылыкъ этгенлени бири Ирина Гусева да джыйылыугъа онлайн халда къошулгъан эди. Ол кесини сёзюнде регионла ишлерине цифра системаланы сингдириуде уллу джетишимле кёргюзгенлерин чертгенди.
Къарачай-Черкесияны муниципал къуралышларыны советини председатели, Джёгетей Аягъы районну администрациясыны башчысы Лайпанланы Мурат да джыйылгъанлагъа хошкелди айтханды, джыйылыуну уллу магъанасы болгъанын чертгенди.
Сессияда цифра ёсюмню хакъындан устала оюмларын айтхандыла. Ала муниципалитлени ишлерине цифра технологияланы сингдириуге болушлукъ этерге, бизни къралыбызда чыкъгъан сервислеге эс бёлюрге кереклисин билдиргендиле.
Стратегия сессияны тамалында «Цифровая трансформация муниципалитетов: вызовы и возможности» деген пленар сессия да бардырылгъанды. Анда цифра технологияланы сингдириуде район башчыны не затха эс бёлюрге кереклисини, цифра ёсюмню стратегиясын къурауну дагъыда ала кибик башха затланы юслеринден сёлешиннгенди.
Ызы бла «Стратегия открытости муниципалитета. Обратная связь как показатель эффективности проектов» деген семинар, «Муниципальные цифровые сервисы для жителей» сессия, «Искусственный интеллект в управлении муниципалитетами: от данных к решениям» окъуу семинар, «Цифровой образ будущих городов: от концепции к реализации» сессия бардырылгъандыла.
Экинчи кюн «О применении нейросетей в работе органов местного самоуправления» деген окъуу семинар къуралгъанды.
