Архыз курорт быйыл да, башха джылладача, къонакълагъа бет джарыкълы тюберге хазырланады.

Туристлени асламысы уа къыш келедиле – ала аякъ чаналада учадыла, кирсиз тау хауа бла солуйдула, чынды джолла бла къар басхан тау башлагъа чыгъадыла.
Архыз курортну кёб ашхылыкъ сакълайды, айтыргъа, умут этгенлерние кёре, 2028-чи – 2029-чу джыллада былайда энтда эки джангы чынды джол бла 10 километрден аслам тау лыжа джол ишленникдиле.
Бу джангылыкъгъа къышхы Архызны сюйгенле бек къууанныкъдыла. Къурулуш ишле келир джыл башланныкъдыла. Лунная поляна бла Фестивальный элчикле турист эллеге саналадыла. Бу джангы объектле да алайлада ишленникдиле.
Чынды джолла бусагъатда туристле излегенча джарашдырыллыкъдыла – ала алты орунлу шиндикле бла баджарыллыкъдыла. Айтыргъа, заманны излемине толу джууаб этерикдиле. Хар сагъатха 2,4 минг адамны учурургъа боллукъдула. Адамла 533, 8 метр мийикликге чыгъыб тюшерикдиле.
Тау лыжа джолланы бютеулей узунлугъу 10,8 километр боллукъду. Белгилисича, ала да бирча барлыкъ тюлдюле – кими тынчыракъ, кими да къыйыныракъ кёрюннюкдю.
Бу проект джашауда толу орун алыр ючюн, тикни къыбыла джанына иш этиб къар къуярыкъдыла.