Къыйын болумгъа тюшген, ачханы кереклисича джояр мадары болмагъан юйдегилеге социал кесаматны тамалында болушлукъ этиуге бизни республикада тыйыншлы эс бёлюнеди.

Сёз ючюн, 2025-чи джылны байрым (февраль) айындан башлаб, социал болушлукъ адамлагъа андан, «джууукъ» болгъанды. Андан бери юйдегиге бир айгъа тюшген ачханы эсеблеген заманда сабий ачха тергелмейди. Аны себебли, сабий ачха тыйылды деб къоркъмай, ууакъ сабийлери болгъан атала бла анала ишге кирирге, кеслерине иш ачаргъа, энчи мюлк къураргъа боллукъдула.
Программа «Юйдеги» миллет проектни тамалында ишлейди. Джылны аллындан бери Къарачай-Черкесияда 1534 социал кесамат этилгенди. Ол сандан 158 келишиу ишге джарашыу бла байламлыды, 105-и къыйын джашау хыйсабны тынчыракъ этерге джораланнганды. Ёзге кесаматланы кёбюсю табышлылыкъ иш бла байламлыды. Айтыргъа, 665 келишиу, 606 кесамат да энчи болушлукъчу мюлк къураугъа багъышланнганды. Алайды да, социал кесаматны кючю бла Къобан райондан Къарабашланы Мадина гипс затла этген хунерлик мастерской ачханды. Аллай юлгюле башха районлада да аз тюлдюле. Къралдан ачха алыб, кими ётмек-булка этген пекарня, кими кондитерский, кими кёгет плантация къурайды. Ол зат, адамлагъа аякъ тирерге мадар берген бла бирге, регионну экономикасын да кёлтюреди.
Энтда быйыл иги кесек кесамат этер мурат барды. Аланы саны джылны аягъына 1900-ге джетерге боллукъду. Бу программа 2021-чи джыл ишлеб тебрегенди – андан бери 7000-нге джууукъ социал кесамат этилгенди. Бу тукъум социал болушлукъ бла хайырланнганланы саны КъЧР-де 25000-нге джууукъду.