Мындан алда Къарачай-Черкесияны Премьер-министри Мурат Аргунов малланы эсебге алыуну тирирек баджарыугъа аталгъан кенгеш бардыргъанды.

Кенгешде Къарачай-Черкесияны джеринде «Хорриотха» тюшюрюлген эсеблени хар нени кеси автомат халда текшерген «ВетИС» деген кърал информацион системагъа къошууну юсюнден сёлешиннгенди.
Мурат Аргунов бу иш республиканы АПК-сын айынытыугъа себеблик этеригин, аны тыйыншлы баджарыр ючюн, районла ашхы сынамларын бир-бирлери бла алмашдырсала иги боллугъун чертгенди.
«Маллагъа маркировка этиу, аланы эсебге алыу, мешхутну къоратыу регионда да, къралны башха джерлеринде да баш джумушланы бириди.
Ол джумушла тыйыншлысыча баджарылсала, хауа болумгъа заран джетерик тюлдю. Туризм да экология джаны бла джарсырыкъ тюлдю», – дегенди Премьер-министр.
Зеленчук, Ногъай, Хабез районлада малланы эсебге алыугъа тыйыншлы эс бёлюннгенин да чертгенди Мурат Аргунов.
Кенгешде бу информацион системаны къалай хайырландыргъанларыны юсюнден КъЧР-ни Ветеринар управлениесини тамадасы Надежда Кознеделева, КъЧР-ни эл мюлк министри Биджиланы Умар, Россельхознадзорну къуллукъчусу Батдыланы Аслан, муниципал районланы администрацияларыны башчылары толу хапар айтхандыла.
Кенгешни ахырында къаралгъан ишлени табыракъ баджарыргъа, файдалы этерге джарарыкъ амалла да айтылгъандыла.